July 21, 2015

" နှစ်၊ .လ၊ နာရီ ခါရာသီရွေ့ပေမယ့်...... "( ၂၀ရက်ဇူလိူင် ၂၀၁၅ နေ့ထုတ် ဒီလှိုင်း စာစောင် အတွဲ(၄) အမှတ်(၂၇) မှ)

" ဗမာတွေ စိတ်ထက်သလေး ဘာလေးနဲ့ တလွဲ ဆံပင်ကောင်းနေကြတယ်။
ဗမာပြည် လွတ်လပ်ရေးရအောင် လုပ်ရတဲ့ တိုက်ပွဲမျိူးမှာ အသုံးမချဘူး၊
ဗမာပြည် ပြန်လည်ထူထောင်ရေးမှာ အသုံးမချဘူး။
ဗမာ ဗမာချင်း ချဖို့မှာ လုပ်ချင်တယ်။
ဒါမျိူးတွေ လုပ်ချင်လို့ ဘယ်တော့မှ အကျိူးမရှိဘူး။
( ဗိုလ်ချူပ်အောင်ဆန်း- နောက်ဆုံးမိန့်ခွန်း မှ
ဇူလိူင် ၁၃ရက် ၁၉၄၇ မြို့တော်ခန်းမရှေ့)
၂၀၁၅ခုနှစ် ၊ ဇူလိုင်လ(၁၉)ရက်နေ့ဆိုပါက (၆၈) နှစ်မြောက် အာဇာနည်နေ့သို့ ရောက်ရှိပေတော့မည်။ မှတ်မှတ်ရရ ၂၀၁၃ခုနှစ်၊ (၆၆) နှစ်မြောက် အာဇာနည်နေ့မှာ မြန်မာ့အသံနှင့်ရုပ်မြင်သံကြားမှ ဗိုလ်ချုပ်အောင်ဆန်းမိန့်ခွန်းများကို ပြန်လည်ထုတ်လွှင့်ပေးခဲ့လေသည်။ မြန်မာ့အသံနှင့်ရုပ်မြင်သံကြားကနေ ဗိုလ်ချုပ်အောင်ဆန်းမိန့်ခွန်းတွေကို လွှင့်ပေးနေပါလားလို့ ဖေ့စ်ဘွတ်မှာ အံ့ဩ ဝမ်းသာစွာ ရေးကြပြောကြ သူများထဲကမှ တစ်ယောက်ကတော့ သူ့ရဲ့ status မှာ
"ဟိုက် .... MRTV က မှတ်တမ်းတွေတော့ သေသေချာချာ သိမ်းထားသဟ ။" လို့ ရေးတာ ဖတ်ရပြီး ဒီစာလေးကို ရေးဖြစ်ခဲ့ပါသည်။
မြန်မာ့အသံနှင့်ရုပ်မြင်သံကြား ဟု ခေါ်ဆိုသည့်အတွက် ရေဒီယိုလို့ လူတိုင်းခေါ်ပြောနေကြတဲ့ အသံချည်းပဲ လွှင့်တဲ့ အပိုင်းနဲ့ ရုပ်မြင်သံကြားခေါ်တဲ့ အရုပ်ရောအသံပါ လွှင့်တဲ့ အပိုင်း ဆိုပြီး ရှိသည်။ နှစ်ခုစလုံးမှာ မှတ်တမ်းထိန်းသိမ်းထားသည့် ဌာနတွေ ရှိပါသည်။ ရေဒီယိုကတော့ ပိုပြီးအများကြီးစောသည်။ လွတ်လပ်ရေးမရခင် အင်္ဂလိပ်လက်အောက်နှင့် ဂျပန်ခေတ်မှာကတည်းက အသံလွှင့်တာစနေပါပြီ။ ၁၉၄၆ ခုနှစ် ဖေဖေါ်ဝါရီလ(၁၅) ရက်နေ့ကစပြီး" ဗမာ့အသံ" နာမည်နဲ့ စတင်ခဲ့တာ ဖြစ်သည်။ ၁၉၄၇ခုနှစ်မှာ အသံကို သွင်းယူထားနိုင်သည့် ( M.S.S Disc Recording Machine) ဓါတ်ပြား အသံသွင်းစက် ရရှိလာသည့်အတွက် နိုင်ငံခေါင်းဆောင်တွေရဲ့ မိန့်ခွန်းတွေကို ဟောပြောနေတဲ့ အချိန်မှာ တခါထဲ အသံသွင်းထားနိုင်ခဲ့ပြီး ပြည်သူတွေကို အသံပြန်လွှင့်ပေးခဲ့နိုင်လေသည်။ သတ္တုပြားများ ဖြစ်သည့်အတွက် ကြာရှည်သိမ်းထား၍ မရနိုင်တာမို့ အိန္ဒိယကိုပို့ပြီး ရောင်းတမ်းဓါတ်ပြားB.P အနေနှင့် ပြန်လည် အသံသွင်းပြီး သိမ်းထားခဲ့ကြရသည်။ ဒါ့ကြောင့် အဲဒီထက်စောပိုင်းကာလတွေက တိုက်ရိုက်အသံလွှင့်ခဲ့သမျှအားလုံး မှတ်တမ်းထားဖို့ ဓါတ်ပြားအသံဖမ်းစက် မရှိသေးတဲ့အတွက် လေထဲမှာပဲ လွင့်ပျောက်ခဲ့ရပါသည်။
ရေဒီယို( အသံလွှင့်ဌာန)မှာ ဓါတ်ပြားတိုက် ရှိပြီး ဓါတ်ပြားတိုက်မှာ ခေတ်အဆက်ဆက် အရေးပါသည့် ၊ အရေးကြီးသည့် မိန့်ခွန်းတွေအပါအဝင် သီချင်းပေါင်းများစွာ( သီချင်းကြီး၊ သီချင်းခန့် ကာလပေါ် စတီရီယိုစသဖြင့် အမြဲလွှင့်ခွင့်ရ အစီအစဉ်များ) ၊ ရေဒီယိုဇာတ်လမ်းပေါင်းများစွာ၊ ဟောပြောချက်များ ကို မှတ်တမ်းမှတ်ရာနဲ့ သေသေချာချာ သိမ်းဆည်းထားပါသည်။ အခြေအနေအရ အသံမလွှင့်ဖြစ်ခဲ့သည့် မိန့်ခွန်းတွေ အပါအဝင် မှတ်တမ်းမှတ်ရာ အသံတွေကို စနစ်တကျ သိမ်းဆည်းထားပါသည်။ လမ်းစဉ်ပါတီခေတ်က ပါတီညီလာခံမှာ တင်သွင်းသည့် တင်ပြချက်တွေသာမက စစ်အစိုးရလက်ထက် အခြေခံဥပဒေရေးဆွဲစဉ် ညောင်နှစ်ပင်ညီလာခံက မှတ်တမ်းမှတ်ရာတွေ အထိ အားလုံးကို သိမ်းဆည်းထားပါသည်။ ရုပ်မြင်သံကြားဌာနမှာလည်း ထို့အတူပင်။ တိပ်ခွေထိမ်းသိမ်းရေးဌာန( Tape Library) မှာ သိမ်းဆည်းထားရသည်။ ရုပ်မြင်သံကြားပေါ်လာတာ မကြာသေးတဲ့အတွက် ယခင်က မှတ်တမ်း တစ်ချို့ကို မော်ကွန်းရုပ်ရှင်က ယူရသည်။ ဗိုလ်ချုပ်အောင်ဆန်း မိန့်ခွန်းပြောတဲ့ပုံ၊ လွတ်လပ်ရေးကြိုးပမ်းမှုကာလက မှတ်တမ်းမှတ်ရာတွေက မော်ကွန်းရုပ်ရှင်ကနေ ပြန်လည်ကူးယူသိမ်းဆည်း ထားတာတွေ ဖြစ်သည်။
နောက်ပိုင်း ရောင်းတမ်းဓါတ်ပြားတွေဖြင့် တစ်ခါထဲပြော တစ်ခါထဲ အသံသွင်းလာကြသည်။ ဓါတ်ပြားတစ်ဖက်မှာ (၃) မိနစ်သာ ဆန့်တဲ့အတွက် ၃မိနစ်ထက် ပိုပါက တခြားဘက် အခြမ်းမှာ ဆက်ပီး အသံသွင်းရသည်။ အဆိုပါ ရောင်းတမ်း BP ဓါတ်ပြားတစ်ချပ်မှာ (၆)မိနစ်စာသာ အသံသွင်းယူထားလို့ရလေသည်။ ဒါ့ကြောင့် ရှေးက အဆိုတော်ကြီးတွေ သီချင်းလာပါက သီချင်းတစ်ဝက်မှာ ခနလေးရပ်သွားပြီးမှ နောက်ဆက်ပီး အသံပေါ်လာတာပါ။ သူက အချင်း ၁၀လက်မ လောက်ရှိပါသည်။ နောက်ပိုင်းမှာတော့ အချင်း(၁၂) လက်မနှင့် အချင်း(၁၆) လက်မအရွယ်ရှိတဲ့ ဓါတ်ပြားတွေ ပေါ်လာရာ အချင်း(၁၆)လက်မရှိသည့် ဓါတ်ပြားတစ်ဖက်မှာ မိနစ်(၃၀)စာ အသံသွင်းလို့ရပြီး အချင်း(၁၂) လက်မဓါတ်ပြားကတော့ အပတ် တစ်ပတ်မှာ ၃မိနစ်နီးပါးဆန့်လေသည်။ ဒါ့ကြောင့် တစ်ဖက်ကို ၃မိနစ် လေးမိနစ်စာ သီချင်းတွေ ၄ပုဒ်လောက် ထဲ့လို့ရလာလေသည်။ ဒီဓါတ်ပြားအကြီးတွေ ပေါ်လာတဲ့အခါ ဗိုလ်ချုပ်အောင်ဆန်း မိန့်ခွန်းတွေကို တစ်စုတစ်စည်းထဲ ဖြစ်အောင် ဓါတ်ပြားအကြီးထဲ ပေါင်းပြီးကူးထားရသည်။ တကယ့်မူရင်းတွေကိုလည်း မပျောက်မပျက်ရအောင် ဆက်ပြီး သိမ်းထားပါသည်။
ဓါတ်ပြားတွေကနေ ကြိုးခွေ သုံးတဲ့ခေတ် ရောက်ပြန်တော့လည်း ကြိုးခွေမှာ ပြန်ကူးပြီး သိမ်းယူထားကြပါသည်။ မူရင်း ဓါတ်ပြားတွေကိုလည်း ဆက်လက် သိမ်းဆည်းထားပါသည်။ အဲဒီ ကြိုးခွေတွေကိုတော့ အသံလွှင့်တာရော၊ အသံသွင်းတာရော ၊ သိမ်းတာမှာပါ တော်တော်ကြာကြာ အထိ အသုံးပြုခဲ့ကြသည်။ အချင်း ၁၀ ၁/ ၂ လက်မ( ဆယ်လက်မခွဲ) ရှိတဲ့ တိပ်ခွေမှာ ကြိုးခွေ ပေ၂၄၀၀ အရှည်ရှိပီး ၇လက်မတိပ်ခွေမှာ တိပ်သားကြိုးခွေက ပေ ၁၂၀၀ရှိသည်။ အချင်း၅လက်မရှိတဲ့ အခွေမှာတော့ တိပ်သား ပေ၆၀၀ ပါလေသည်။ အဆိုပါ ကြိုးခွေ ၁၀ ၁ /၂ လက်မ ( ဆယ်လက်မခွဲ) ရှိတဲ့ အခွေတွေနဲ့လည်း ဗိုလ်ချုပ်အောင်ဆန်း မိန့်ခွန်းတွေကို သိမ်းဆည်းထားပါသည်။ နည်းပညာတိုးတက်လာတဲ့ အလျောက် အဲဒီပြောင်းလဲလာသည့် အသံသွင်းတိပ်ခွေများ၊ အသံသွင်းစနစ်များဖြင့် အဆင့်ဆင့် ထိန်းသိမ်းထားကြလေသည်။
နောက်ပိုင်း ကက်ဆက်ခွေတွေ ပေါ်လာသည့်အခါ ကက်ဆက်ခွေတွေနဲ့ ပြန်လည်ကူးယူပြီး သိမ်းရပြန်ပါသည်။ ဆိုက်ဒ်- အေ၊ ဆိုက်ဒ်- ဘီ နှစ်ဘက်ရှိပြီး စီ- ၆၀ အခွေမှာ တစ်ဆိုက်ဒ်ကို မိနစ် ၃၀စာ အသံသွင်းလို့ရပြီး တစ်ခွေမှာ တစ်နာရီစာ အသံသွင်း၍ ရသည့်အတွက် ကိုင်ရတွယ်ရတာ သေးငယ်ပြီး မှတ်တမ်းများ ပိုပြီး တစုတစည်းတည်း သိမ်း၍ အဆင်ပြေလာလေသည်။ စီ- ၉၀ ဆိုပါက တစ်ဖက် ၄၅မိနစ်ဆန့်ပြီး တစ်နာရီခွဲစာ အသံသွင်းထားနိုင်လေသည်။ ထိုမှတဖန် စီဒီ တွေ ပေါ်လာသည့် အခါ စီဒီမှာလည်း ဗိုလ်ချုပ် မိန့်ခွန်းတွေကို ပြောင်းလဲပြီး ကူးယူ သိမ်းဆည်းခဲ့ရပါသည်။ သဘောကတော့ ဒီမိန့်ခွန်းတွေကို ပျောက်ပျက်မသွားအောင်ရယ် ဘယ်ခေတ် ဘယ်အချိန်ရောက်ရောက် ပြန်ပီး အသံလွှင့် နိုင်ဖို့အတွက်ဖြစ်လေသည်။ ဥပမာ- ဓါတ်ပြားထဲမှာ ရှိတယ်ဆိုပြီး ဒီအတိုင်း ထိန်းသိမ်းထားခဲ့ရင် ဒီကနေ့ အချိန်ရောက်လို့ အသံလွှင့်တဲ့အခါ ဓါတ်ပြားစက်တွေ မရှိတော့သည့် အတွက် ဘယ်လိုမှ အသံလွှင့်ပေးဖို့ မရနိုင်တော့ပါ။ DAT ဆိုတဲ့ တိပ်ခွေ တမျိူးကို အသုံးပြုခဲ့သေးသည်။ သူက ကက်ဆက်ခွေနဲ့တူပေမယ့် ကက်ဆက်ခွေလောက်မကြီးပဲ အတော်သေးသည်။ အသံသွင်းဖို့အနေနဲ့ တော်တော်ကောင်းပေမယ့် အသံလွှင့်ရာမှာ အခက်အခဲတွေ အများကြီးဖြစ်သည့် အတွက် သိပ်ကြာကြာ အသုံးမပြုခဲ့ပါဘူး။
အခု နောက်ဆုံးအနေနဲ့ကတော့ ဗိုလ်ချုပ်အောင်ဆန်းမိန့်ခွန်းတွေကို ကွန်ပြူတာထဲမှာ သိမ်းဆည်းထားနိုင်ခဲ့ပါပြီ။ ပြောင်းလဲလာတဲ့ ခေတ်နဲ့အညီ တိုးတက်ကောင်းမွန်လာတဲ့ အသံကူးပြောင်းစနစ်တွေနဲ့ စနစ်တကျ သိမ်းဆည်းထားပြီး အသံပြန်လွှင့်နိုင်အောင် စီစဉ်ထားကြတာပဲ ဖြစ်လေသည်။
စာရေးသူတို့ ငယ်စဉ်က အာဇာနည်နေ့ရောက်ပြီဆိုရင် အဲဒီည ၈နာရီ သတင်းအပြီးမှာ ဗိုလ်ချုပ်အောင်ဆန်း မိန့်ခွန်းတွေကို အားပါးတရ နားထောင်ခဲ့ရသည်။ ဓါတ်ပြားထဲက ရှဲရှဲ.. ရှဲရှဲ ဆိုတဲ့ အသံတွေကြားက ဗိုလ်ချုပ်ရဲ့ မိန့်ခွန်းတွေကို နားစိုက်ခဲ့ရသည်။ အခု နောက်ပိုင်းတော့ ကွန်ပျူတာနဲ့ ပြန်သွင်းတာမှာ တစ်ချို့ ရှဲရှဲ ရှဲရှဲ အသံတွေကို ဖျောက်လို့ရသည်ဟု သိရသည်။ ( တကယ်တော့ ဓါတ်ပြားမှာပါရှိတဲ့ လိုင်းတွေ ကြားထဲမှာ အမှုန်လိုဟာမျိုး နဲ့ အသုံးမပြုတာကြာတဲ့ အတွက် မှိုကပ်နေတာမျိုးကြောင့် ဓါတ်ပြားပေါ် အပ်ထောက်တဲ့အခါ မလိုလားတဲ့ အသံတွေပါ ထွက်နေတာဖြစ်လေသည်။)
၁၉၈၈ ခုနှစ်နောက်ပိုင်း ၁၉၉၀ ခုနှစ်ခန့်က စပြီး ဗိုလ်ချုပ်အောင်ဆန်း မိန့်ခွန်းတွေကို အသံလွှင့်ခြင်း မရှိတော့ပါဘူး။ အသံလွှင့်ဝန်ထမ်းတွေကတော့ မလွှင့်ရဆိုလို့သာ မလွှင့်တာ ဘယ်သူက ခိုင်းစေတယ် ဘယ်သူက ပိတ်ပင်တယ်ဆိုတာ မသိခဲ့ ကြပါဘူး။ ထုံးစံအရ မလွှင့်ရဆိုပါက အဲဒီ တိပ်ခွေကို ဓါတ်ပြားတိုက်ကနေတောင် ထုတ်ယူခွင့် ရှိတာမဟုတ်ပါဘူး။ ဥပမာ- ထိုစဉ်က ကိုင်ဇာ သီချင်းတွေ မလွှင့်ရ ဆိုပါက သူ့သီချင်းတွေကို ဓါတ်ပြားတိုက်ကနေ ထုတ်ယူလို့မရပါဘူး။ တိပ်ခွေစာရင်းဘေးမှာ မင်နီနဲ့ မလွှင့်ရလို့ ရေးထားတဲ့အတွက် မတော်တဆ နံပါတ်မှားရေးပြီး ထုတ်ဖို့ပြင်ရင်တောင် ဓါတ်ပြားတိုက်က တာဝန်ရှိတဲ့သူက စာအုပ်ပြပြီး မလွှင့်ရ ရေးထားတယ် မရဆိုပြီး ပေးမထုတ်ပါဘူး။
အခုတော့ ၁၉၉၀ခုနှစ်ကနေ စတင် ရေတွက်လိုက်ရင် (၂၃) နှစ်အကြာမှာမှ ဗိုလ်ချုပ်အောင်ဆန်း မိန့်ခွန်းတွေကို ပြန်လည် အသံလွှင့်တာ ကြားရပါပြီ။ တကယ်တော့ ဒီလို အသံလွှင့်နိုင်ခဲ့တာဟာ မူရင်း ရောင်းတမ်း ဓါတ်ပြား B.P တွေကနေ တစ်ဆင့်ပြီးတစ်ဆင့် ကူးယူထိန်းသိမ်းခဲ့ကြလို့သာ ဖြစ်လေသည်။ မြန်မာ့အသံဝန်ထမ်းတွေသည် အများသူငါလိုပင် လူထဲကလူ ပြည်သူထဲက ပြည်သူတွေပင်၊ တာဝန်အရ အလုပ်လုပ်ကြပေမယ့် တိုင်းပြည်မှာ ထိန်းသိမ်းထားသင့်သော ကိစ္စတွေကို တတ်နိုင်သည့် နေရာမှ ဝင်ရောက် ထိန်းသိမ်း ကာကွယ်ထားကြပါသည်။
ပြန်ကြားရေးဝန်ကြီးတစ်ဦး တာဝန်ယူစဉ်က ၎င်း၏သားတစ်ယောက် ရှယ်ယာပိုင်ထားသည့် အသံလွှင့်မီဒီယာ FM တစ်ခုထံကို ဓါတ်ပြားတိုက်မှ သီချင်းများ ပေးဖို့ ဖိအားပေးခံရရာ တတ်နိုင်သလောက် နေ့ရွှေ့ ညရွှေ့ အကြောင်းအမျိူးမျိူးပြပြီး မပေးပဲ နေခဲ့သည့် ဓါတ်ပြားတိုက်မှုး တစ်ယောက်လည်း ရှိခဲ့ပါသည်။ အလုပ်မှ ထွက်သွားပြီ ဖြစ်သော အဆိုပါ ဓါတ်ပြားတိုက်မှုးနှင့် ပြန်ဆုံစဉ် သူမရှိတော့သည့် နောက်ပိုင်း အခုတော့လည်း ပေးလိုက်ရပြီ ဟုဆိုလေသည်။
တန်ဖိုးရှိသော သမိုင်းဝင် ဗိုလ်ချူပ်အောင်ဆန်းမိန့်ခွန်းများကိုတော့ အနှစ်နှစ်ဆယ်ကျော် အသံမလွှင့်ပဲ ပိတ်ပင်ထားခဲ့ပေမယ့် ပျောက်ကွယ်မသွားအောင် နည်းပညာပြောင်းလဲသွားတိုင်း အရင်ဦးဆုံး ကူးပြောင်းယူခဲ့ကြပါသည်။ ၂၀၁၃ခုနှစ်၊ (၆၆) နှစ်မြောက် အာဇာနည်နေ့မှာ ပြန်လည်ထုတ်လွှင့်သည့် ဗိုလ်ချူပ်အောင်ဆန်း မိန့်ခွန်းများကို နားထောင်ရင်း ဝန်ထမ်းအဆက်ဆက် အသိစိတ်ဖြင့် ထိန်းသိမ်းခဲ့သည့် ဖြစ်စဉ်များကို ပြန်လည်သတိရကာ (၆၈)နှစ်မြောက် အာဇာနည်နေ့ အမှတ်တရ ရေးသားလိုက်ပါသည်။ တဆက်ထဲမှာပင် ကာလရှည်ကြာ ပိတ်ပင်ခံထားရသည့် အဆိုတော် မေလှမြိုင်ရဲ့ အလေးပြုပါသည် သီချင်းဖြင့် ဗိုလ်ချူပ်အောင်ဆန်းနှင့်တကွ ကျဆုံးလေပြီးသော အာဇာနည်ခေါင်းဆောင်များကို ဦးညွတ်အလေးပြုလိုက်ရပါသည်။
"( နှစ် လနာရီ ခါရာသီရွေ့ပေမယ့် အာဇာနည်နေ့ ကိုဖြင့် မမေ့သင့်ပါသလေ၊ ယနေ့ဖြင့် သတိတရားထားဖို့အခြေ............... အများပြည်သူတွေ ...အများပြည်သူတွေ အာဇာနည်နေ့ကိုလေ............ တွေးရှုကာပဲ ..အလေးပြုပါမယ်လေ ၊ )၂
စနစ်အခြေ..ပြောင်းခဲ့ပေမယ့် အဖြစ်ဟောင်းများတော့ ဖြေသော်မပြေ ၊ လွမ်းမျက်ရည် မြေခပြီမို့..တွေး.......တသသ၊ ဆွေး.စ မရွှင် ရွှေရင်ဆို့ကဲ ကြေကွဲဝမ်းနည်းရပုံတွေ ယနေ့ထက်တိုင်အခြေ အော်.. မမေ့ရက်နိုင်ပါပေ အာဇာနည်ခေါင်းဆောင်ကြီးတွေ အာဇာနည်ခေါင်းဆောင်ကြီးတွေ ကောင်းရာသုဂတိ ရောက်ရှိကြပြီလေ၊ တေးကဗျာအနုစာခွေ ရေးကာ အလေးပြု အလေးပြုပါတယ်လေ................
........."
ခိုင်ခိုင်စောလွင်

No comments:

Post a Comment