" အတိတ်ရဲ့ ဒါဏ်ရာတခု"၂၁ရက် ဩဂုတ်လ ၂၀၁၇ ဒီလှိုင်းစာစောင် အတွဲ(၆) အမှတ် ( ၃၂) မှ

ကိုယ်လက်တွေ နာကျင်ကိုက်ခဲပြီး ဖျားချင်ချင် ဖြစ်တာနဲ့ ပါရာစီတမောတလုံးသောက်ပြီး ဆေးရုံသွားပြလိုက်သည်။ ဆေးအရှိန်ကြောင့် အဖျားသွေးပျောက်သွားဟန်ထင့်၊ ဆရာဝန်နဲ့ တွေ့တဲ့အချိန်မှာ အဖျားမရှိတော့ပါ၊ ဆရာဝန်လည်း ချောင်းဆိုးသလား နှာစေးသလား မေးရိုးမေးစဉ် မေးခွန်းတွေ မေးပြီး ဆေးပေးလိုက်သည်။ ဆေးယူတဲ့အခန်းမှာ ဆေးသွားယူတော့ ဝန်ထမ်းဖြစ်သူ အမျိူးသမီးက ဆေးသောက်ရမည့် အညွှန်းစာရွက် ကပ်ထားတာ ပြရင်း နှုတ်ကလည်း ထပ်မံရှင်းပြသည်။ ပါရာစီတမော အလုံး(၂၀)ပါ တအိတ်၊ ချွဲပျော်ဆေး bisolvon (၁၅)လုံးပါ ပလတ်စတစ်ထုတ်တထုတ်၊ နှာစေးပျောက်ဆေး Maxiphed (၁၀)လုံးပါတအိတ်၊ ချောင်းဆိုးပျောက်ဆေး Dextrome( ၁၀)လုံးပါ တအိတ် စုစုပေါင်း ဆေးလေးမျိူး ပေးလိုက်သည်။ ငွေကြေး တပြားတချပ်မှ မပေးခဲ့ရပါ။ ထိုင်းအစိုးရက တယ်ဟုတ်ပါလား ၊ ဆေးဝါးကုသမှုစားရိတ် အလကားပေးနိုင်တယ်လို့ ယူဆက မမှန်ပါ၊ ထိုင်းနိုင်ငံသာမက ကမ္ဘာအဝှမ်း ချမ်းသာသည့် နိုင်ငံများ အပါအဝင် နိုင်ငံတိုင်းမှာ ဆေးဝါးကုသမှု စားရိတ်အတွက် ကျန်းမာရေးအာမခံ ဆိုတာ ပြည်သူတိုင်းက ကြိုတင်ပေးသွင်းထားရတာဖြစ်သည်။
ဆေးရံကနေ အိမ်ပြန်အရောက် စိတ်ပြေလက်ပျောက် ဖေ့စ်ဘွတ်ဝင်ကြည့်မိတဲ့အခါ လူအတော်များများ ပြောနေကြသည့် ခေါင်းစဉ်က ချပ်သင်း တဲ့၊ ဒါနဲ့ မနက်ကတော့ ဗီဒီယိုဖိုင်တခု တွေ့လိုက်မိပြီး မျက်နှာထားရိုးရိုးရှင်းရှင်း သိမ်သိမ်မွေ့မွေ့နဲ့ လူတယောက်က မတ်တတ်ရပ်အနေအထားနဲ့ရှိနေတာမှာ မျက်နှာချင်းဆိုင်က လူငယ်ကလေးတယောက်က နွဲ့နွဲ့လျလျ လျှာအပြားလိုက် သွားစေ့ပြီး ပြောတဲ့ လေသံနဲ့ လုပ်ပြောပြော နေတာမြင်ရလို့ စိတ်ပျက်စွာ မကြည့်ပဲ ကျော်သွားခဲ့သည့် ဗီဒီယိုဖိုင် ဖြစ်နေသည်။ အခုခေတ် ယောင်္ကျားလေး မိန်းကလေး အတော်များများ စကားပြောတာ မိန်းကလေးနဲ့ ယေင်္ကျားလေး ပြောပုံဆိုပုံ လေယူလေသိမ်း မကွာကြတာ သတိပြုမိသည်။ လူထုဒေါ်အမာ ရေးသည့် အမေ့ရှေးစကားထဲက စာတွေ သတိရမိလေသည်။ တချိန်ကတော့ ကြည်လင်ပြတ်သားသည့် ပြောဆို တင်ဆက်မှုမျိူးကို ရေဒီယို ရုပ်မြင်သံကြားတွေကနေ မှတ်သား အတုယူလို့ရသည်။ ယခုခေတ်ကတော့ အက်ဖ်အမ်မ် တွေမှာ ပြောနေကြတာ ယေင်္ကျားမိန်းမ ချွဲပစ်နေကြသည့် လုပ်သံတွေ များလှရာ ခေတ်ကာလ လူငယ်အချိူ့ ဒီလိုပုံစံတွေ အတုခိုးပြောတာ မဆန်းလှလို့ ဆိုရမည်။
" ချပ်သင်း" တိုက်နယ်ဆေးရုံမှာ အဆိုပါလူငယ်ကလေးတွေ ဖွင့်ထားသည့် ပြင်ပစာသင်စောင်က ကျောင်းသူကလေးတွေ ဆေးခန်းလာပြရာက အဆင်မပြေဖြစ်တာတွေကို တိုက်နယ်ဆရာဝန်ထံ လာရောက်ပြောပြနေတဲ့ ဗီဒီယိုဖိုင် ဖြစ်သည်။ အဓိက ပြဿနာက ဆေးရုံမှာ ဆေးဝါးမလုံလောက်တာ၊ ဆေးရုံမှာ ဆေးမရှိပေမယ့် အပြင်မှာ ဝယ်လို့ရနေတာ၊ နောက်တခုက တိုက်နယ်ဆရာဝန်လေးရဲ့ ပြင်ပဆေးခန်းမှာ ကုသရင် တန်ရာတန်ကြေးကျသင့်စွာပေးနိုင်က ကုလို့ ရတာ ဒါတွေကို ပြောဆိုနေကြတာ ဖြစ်သည်။ ဗီဒီယိုဖိုင်ကိုကြည့်ပြီး စနစ်ဆိုးရဲ့ သားကောင်များ ဆိုသည့် စကားလုံးကိုသာ တွင်တွင်သတိရနေမိတော့သည်။ ဆေးရုံမှာ ဆေးဝါးမလုံလောက်တာ မြန်မာပြည် တနံတလျားရှိ ဆေးရုံတိုင်းလိုလိုပါ။ ချပ်သင်း တိုက်နယ် တခုထဲ မဟုတ်ပါ။ ရန်ကုန်မြို့က ရန်ကုန်ပြည်သူ့ဆေးရုံကြီးမှာတောင် ဆေးဝါးပြည့်စုံလာတယ်လို့ ပြောစမှတ်ပြုကြတာ တနှစ်ဝန်းကျင်သာ ရှိပေအုန်းမည်။ ကျန်းမာရေးအသုံးစားရိတ်က ၂၀၁၂ ခုနှစ် တုန်းက လူတဦးချင်း GDP ရဲ့ ၂ရာခိုင်နှုန်း သာ ရှိခဲ့သည်။ ဆေးရုံမှာ ဆေးဝါးမလုံလောက်တာတင်မက အရက်ပြန်က အစ ဝယ်ရတယ် ဆိုတာမျိူးက ဖြစ်နေတာ ဆယ်စုနှစ် သုံးစုပင်မကတော့၊ ဆေးရုံမှာ တာဝန်ကျသည့် ဝန်ထမ်းတွေမှာ သူတို့လုပ်အားကို မရှိမဲ့ရှိမဲ့ ဆေးဝါးများကို အသုံးပြုရင်း အစွမ်းကုန် ကုသပေးကြပါလိမ့်မည်။ ကိုယ်တိုင်လုပ်ပိုင်ခွင့်ရမည့် ကိုယ်ပိုင်ဆေးခန်းမှာဆိုက ကိုယ့်ဘတ်ဂျက်နဲ့ကိုယ် လိုသည့်ဆေးတွေ ဝယ်ဖြည့် ကုသပေးက ဆေးရုံမှာ မရှိသည့်ဆေး မရသည့်ဆေးဖြင့် တတပ်တအား ကူညီ ကူသပေးရင်း ရပ်ရွာရဲ့ ကျန်းမာရေး ပြဿနာကို တဖက်တလမ်းက ဖြေရှင်းတာလည်း ရောက်သည်။ ဆေးရုံမှာ လာမကုနဲ့ ငါ့ဆေးခန်းလာလို့ ဘယ်ဆရာဝန်ကမှ ပြောမှမဟုတ်၊ သူတို့ သင်ယူခဲ့သည့် ဆေးပညာဘွဲ့ယူစဉ်ကတည်းက သူတို့ ကတိသစ္စာပြုပြီးသား။ ဆေးကူသသည့် ဆရာဝန်ဆိုတာ တော်ရုံ စိတ်ဖြင့် မလုပ်နိုင်၊
အဆိုပါ ဆရာဝန်မှာလည်း ဆေးရုံမှာ မဖြေရှင်းနိုင်သည့် ကုသမှုတွေကို သူ့ရဲ့ကိုယ်ပိုင်ဆေးခန်းမှာ ဖြေရှင်းပေးဟန်တူသည်။ စေတနာနှင့် အသပြာ တွဲမိတော့ အထင်လွဲစရာတွေ ဖြစ်ကြပြန်သည်။ ဆေးရုံမှာ ဆေးမရှိပဲ ဆေးခန်းကျ ဆေးရှိသည် ဖြစ်နေတာ၊ ဒါလည်း မြန်မာတနိုင်ငံလုံး ဒီလိုချည့်သာ။ ဆေးရုံတွေမှာ ဆေးမရှိပဲ ပြင်ပဆေးဆိုင်တွေမှာ ဆေးတွေတောင်ပုံယာပုံ ရှိနေသည်။ ငွေရှိက ဘာဆေးလိုချင်သလဲ နာမည်ပြော မရမရှိ။ ဒီလိုဖြစ်နေတာကိုက အလွဲတခု မဟုတ်ပါလား။ ဆေးကုသနေရသည့် စနစ်ကိုက အစိုးရဆေးရုံတွေကနေ ဝန်ဆောင်မှုရော ဆေးဝါးပါ အလကားပေးရသည့် စနစ်မျိူး ဖြစ်နေသည်။ ချမ်းသာသည့် တိုင်းပြည်များမှာပင် ဆေးရုံသွားပြ ဝန်ဆောင်မှုနှင့် ဆေးအလကားရတာ မရှိပါ။
ထိုင်းနိုင်ငံရဲ့ ကျန်းမာရေးစောင့်ရှောက်မှုက ကမ္ဘာ့အဆင့်မီရှိသည်။ မြန်မာလူမျိူးတွေသာမက အခြားတိုင်းပြည်အသီးသီးကပင် လာရောက် ဆေးကုသခံယူကြသည်။သို့ဖြစ်ရာ ထိုင်းပြည်သူတွေအတွက် ကျန်းမာရေး စောင့်ရှောက်မှုကဖြင့် အင်မတန်ပြည့်စုံမှု ရှိသည် ပြောရမည်။ ပြည်သူလူထုရဲ့ အဓိကလိုအပ်ချက်ကို ဖြည့်ဆည်းပေးဖို့ အကောင်အထည်ဖော်တာမှာ ကျန်းမာရေးစောင့်ရှောက်မှုအတွက် အစီအစဉ်ကောင်းတွေ ချမှတ်လုပ်ဆောင်နိုင်ခဲ့တာလည်း တခုအပါအဝင်ပင်၊ " အစိုးရဝန်ထမ်း၊ ပုဂလိကဝန်ထမ်းနှင့် ထိုင်းအစိုးရက တရားဝင်ခွင့်ပြုထားသည့် အဖွဲ့အစည်းအသီးသီးမှာ အလုပ်လုပ်ကိုင်ကြသည့် ဝန်ထမ်းနှင့် အလုပ်သမားများမှာ လစာဝင်ငွေရဲ့ ငါးရာခိုင်နှုန်းကို ကျန်းမာရေးအာမခံအဖြစ် လစဉ်ပေးသွင်းရလေသည်။ ဘတ်(၇၅၀) ထက်မပိုသော ပေးသွင်းမှုဟုဆိုရာ လခများသူလည်း (၇၅၀) ထက်တော့ ပိုမသွင်းရဟုဆိုလိုသည်။ ထိုသို့ အာမခံပေးသွင်းထားသူမှာ မိမိအာမခံထားရှိရာ ဆေးရုံကို သွားပြပါက ဝန်ဆောင်မှုအပါအဝင် ဆေးဖိုးဝါးခ ပေးရန်မလိုချေ။ ဆေးရုံတက်ရတာမျိူးနှင့် ခွဲစိတ်ကုသတာမျိူးတွေမှာပါ ပေးရန်မလိုပေ။ အာမခံထားချင်သည့် ဆေးရုံမှာ အစိုးရဆေးရုံသာမက ပုဂ္ဂလိက ဆေးရုံတွေမှာပါ ထား၍ ရလေသည်။ ဆေးရုံလာသည့်အခါ အာမခံကဒ်ပြလိုက်ရုံသာ။
အစိုးရဝန်ထမ်းမဟုတ်သည့် အခြားထိုင်းပြည်သူများအတွက်ကတော့ ဘတ်(၃၀) ဆေးကုသမှုဆိုတာ ရှိသည်။ အဆိုပါအစီအစဉ်ကို စတင်ခဲ့တာ အနှစ်(၃၀) ရှိပြီဟု ဆိုလေသည်။ ဘတ်(၃၀)ဖြင့် ဆေးဝါးကုသမှု ခံယူနိုင်သည့် သူတွေထဲ မြန်မာအလုပ်သမားတွေပါ အခွင့်အရေးရရှိပါသည်။ ထိုင်းနိုင်ငံကို လာရောက်အလုပ်လုပ်နေကြသည့် ရွှေ့ပြောင်းအလုပ်သမားတွေ ကျန်းမာရေးစောင့်ရှောက်မှု မရရှိက ထိုင်းအစိုးရမှာပါ နစ်နာမှုတွေ ရှိသည်။ ဒါ့ကြောင့် ကျန်းမာရေးစောင့်ရှောက်မှုကို တန်းတူပေးထားတာဖြစ်သည်။ ဘတ်(၃၀) ကဒ်ဖြင့်ပြက ဆေးရုံမှာ ဘတ်(၃၀)သာ ပေးသွင်းရတာဖြစ်သည်။ ဆေးဝါးကတော့ ဆေးရုံတိုင်းမှာ အပြည့်ရှိသည်။ ပြင်ပဆေးဆိုင်တွေမှာလည်း ဆေးတွေ ပေါပေါများများ ရှိသည်။ ဈေးနှုန်းလည်း ချိူသာသည်။ အကြောင်းက ဆေးဝါးအပေါ် ကောက်ခံသည့် အခွန်က မဖြစ်စလောက်သာ၊ အရက် ဆေးလိပ်အပေါ်ကောက်ခံသည့် အခွန်ကသာ အများဆုံးဖြစ်သည်။ ဒါ့အပြင် ထိုင်းပြည်တွင်းမှာပင် ဆေးဝါးမျိူးစုံ ထုတ်လုပ်နိုင်ရာ ပြည်ပမှဝယ်ယူရတာ အင်မတန်နည်းပါးသည့်အချက်က ဆေးဝါးလိုအပ်ချက် ပြည့်စုံနေမှုရဲ့ အဓိကအားသာချက်ဖြစ်သည်။
သာမန် ထိုင်းပြည်သူလည်းမဟုတ်၊ ထိုင်းအစိုးရဝန်ထမ်းလည်း မဟုတ်သည့် နိုင်ငံခြားသားများဆိုပါက ကျန်းမာရေး အာမခံ ဝယ်ယူခွင့်ရှိသည်။ ပုဂ္ဂလိက ကုမ္မဏီတွေမှာ ကျန်းမာရေးအာမခံ ထားရှိသူမှာ ဆေးရုံပြတာ ဆေးရုံတက်တာ ခွဲစိတ်တာ စသဖြင့် အဆင့်လိုက် ကျသင့်သလို အာမခံကုမ္မဏီက ပေးသွင်းပေးသည်။
ကျန်းမာရေးနှင့်ပတ်သက်၍ ဆေးရုံကို လူနာတယောက် ရောက်လာက ပထမဆုံးလုပ်ရာမှာက ကုသမှုလို့ ထိုင်းအစိုးရက ဆိုထားသည်။ ထိုင်းအစိုးရအဆက်ဆက် ပြောထုံးက ဆေးရုံကို လူနာရောက်လာခဲ့ရင် အဆိုပါလူနာမှာ ဘယ်သူလဲ ဘာတွေရှိလဲ ဆိုတာထက် အရင်ဆုံးကုသပေးလိုက်ပါတဲ့၊
အဆိုပါ စကားအမှန်ဆိုတာ မျက်မြင် ကြုံဖူးတာ နှစ်ခါရှိပါသည်။ ပထမတခါက ဆေးရုံမှာ စောင့်နေတုန်း အလုပ်သမားတယောက် လုပ်ငန်းခွင် မတော်တဆမှုဖြစ်ပြီး သတိမေ့လျက် ရောက်လာသည်။ သူနာပြု ဆရာဝန်နှင့် အခြားကျန်းမာရေးဝန်ထမ်းတွေ အရေးပေါ်အခန်းဖွင့်ပြီး ချက်ခြင်းကုသပေးသည်။ ဆေးထုတ်သည့်အခန်းပြေးပြီး ဆေးသွားထုတ်သူက ထုတ်၊ ပြေးပြေးလအားလွှား ကုကြသည်။ ပြီးမှ ဝန်ထမ်းတယောက်က လူနာနှင့်အတူပါလာသည့် အဖော်ကို မှတ်ပုံတင်ဌာနကို သွားပြီးစာရင်းသွင်းခိုင်းသည်။ ဆရာဝန်နှင့် သူနာပြုများ အခန်းထဲကနေ လိုတာတောင်း ဆေးအပါအဝင် ပစ္စည်းကရိယာ အသင့် ၊ လူနာစိတ်ချရပြီဆိုမှ ဆရာဝန်က ထွက်လာကာ လုပ်ဆောင်ရမှာတွေကို လူနာရှင်ကိုပြော၊ ငွေစကားကို ဆရာဝန်ကပြောစရာမလို၊ ဒီလောက်ကုန်မယ် တတ်နိုင်လား၊ ဒီဆေးက ဈေးကြီးတယ် ဆေးရုံမှာမရှိဘူး ဘယ်ဆေးခန်းမှာသွားဝယ် ပြောစရာမလို၊ ပြောတောင်ပြောဖူးကြရဲ့လားမသိ။ ဆရာဝန်က ကုသရေးသက်သက်၊ သူကုဖို့ လိုအပ်တာ အသင့် ၊
နောက်တယောက်ကတော့ မြန်မာပြည်ကနေ ချင်းမိုင်ကို အလည်လာတဲ့ မိတ်ဆွေတယောက်၊ ဆိုင်ကယ်မှောက် သတိလစ်ပြီး ဆေးရုံရောက်တာ အရေးပေါ်ခန်းထဲထည့်ပြီး လိုအပ်တာအကုန်ကုသမှုပေးထားသည်။ အသက်ကို မရရအောင် ကယ်ထားသည်။ အသက်ရှုနေပေမယ့် သတိမရသေး၊ ဘယ်သူကမှ ငွေရေးကြေးရေး တပြားမှ မပေးရသေးပဲ လူ့အသက်ကို ကယ်ရမည်ဆိုသည့် စိတ်ဖြင့် ကုသမှုကို ဦးစားပေးထားတာဖြစ်သည်။
ကျန်းမာရေးစောင့်ရှောက်မှုကိစ္စ စာရေးတဲ့အခါ အချက်အလက် မှားမှာဆိုးတဲ့အတွက် ထိုင်းလူမျိူး ဆရာမကို သေချာ မေးမြန်းရသည်။ သူက ကျန်းမာရေးစောင့်ရှောက်မှုမှာ ထိုင်းက မြန်မာထက်အများကြီးသာပါတယ်လို့ ပြောတာကို မှန်ပါတယ်လို့ ပြောလိုက်ရတာပါပဲ၊ စိတ်ထဲကတော့ သူတို့ကံကောင်းလိုက်တာ၊ တို့လူမျိူးတွေ ဘာလို့ ဒီလို အခွင့်အရေးမရကြတာလဲ လို့ တွေးနေမိသည်။ ကိုယ်တိုင်ပင် ထိုင်းရောက်ကာစက ဘာအာမခံမှုမှ မရှိတာကနေ မြန်မာရွှေ့ပြောင်းကျောင်းမှာ ဆရာမဝင်လုပ်တဲ့အခါ ထိုင်းအစိုးရက ပေးသည့် ကျန်းမာရေးအာမခံကို ရရှိခံစားခွင့် ရလေသည်။ လစဉ်အာမခံကြေး ဘတ်(၇၅၀) ပေးသွင်းရသည်။ ထိုင်းဆရာမက ပြောတာက ကိုယ့်ရဲ့အာမခံကို ကိုယ်တိုင်မသုံးရလို့ ကျန်းမာရေးကောင်းလေလေ ကုသိုလ်ပိုရလေပေါ့တဲ့၊ ဘာလို့လည်း ဆိုတော့ ဒီငွေတွေနဲ့ ဝေမျှပြီး ကုသပေးနေတာမို့ တခြားကုသဖို့လိုတဲ့သူတွေကို ကျန်းမာရေးစားရိတ် share ပေးတဲ့သဘောပေါ့တဲ့၊ အစိုးရက ဒီလောက်လူအများကြီး အလကား ဘယ်တတ်နိုင်ပါ့မလဲတဲ့၊ ဒါအစိုးရက ဖော်ဆောင်ထားတဲ့ ဝေမျှစနစ်တခုပေါ့လို့ ဆိုသည်။
ထိုင်းကျန်းမာရေးစောင့်ရှောက်မှုအတွက် အဓိက ထားသည့် ဆရာဝန်တွေ ပြောသည့်စကားတခွန်းက " When most doctors see patients they don't see schemes...... they treat diseases. "
ဘယ်သူပဲဖြစ်ဖြစ် ဘယ်နိုင်ငံသားပဲဖြစ်ဖြစ် ကိုယ့်အလုပ်ကို နောက်ဆံတင်းတင်း နဲ့ ပြည့်ပြည့်ဝဝ လုပ်ရက စိတ်အေးလက်အေး ရှိကြပေမည်။ မိမိအလုပ်ကို ကြောင့်ကျခပ်သိမ်းမရှိပဲ လုပ်နေရက လုပ်ငန်းခွင်ပျော်ရွှင်မှုရရှိမည်။ အဆိုးဆုံးဖြစ်သည့် ကိုယ့်အလုပ်ကို စော်ကားတာ ကိုယ့်ဋ္ဌာနကို စော်ကားတာမျိူးကို ဘာမှပြန်မပြောပဲ စိတ်လျှော့လက်လျှော့ ပြောချင်တိုင်းသာပြောကြပါလို့ လည်စင်းပေးနေရသည့် ဘဝတွေက လွတ်ချင်ကြသူချည့်သာ၊ အခုတော့ ငါဘယ်သူလဲ မင်းဘယ်သူလဲ ဆိုတာတွေကြားမှာ အပြစ်ရှိသူပမာ အပြုံးမပျက် ရပ်ပီး နားထောင်နေပေးရတဲ့ ဘဝတွေ ဘယ်လောက်တောင် ဘယ်အချိန်ထိ နေပေးနေကြရမှာပါလိမ့်။
ခိုင်ခိုင်စောလွင်