May 18, 2014

သရဲအကြောင်း

May 15, 2014 at 6:02pm
    အမြန်လမ်းပေါ်မှာ အကျွတ်အလွတ်ပွဲတော် ပြုလုပ်တာနဲ့ ပတ်သက်ပြီး ပရလောကသားဆိုတာ ရှိတယ်၊ မရှိဘူး၊ ယုံတယ် မယုံဘူး စတာတွေ ဖတ်ရတဲ့အခါ ကိုယ်ကိုယ်တိုင်လဲ ပရလောကသားတွေ ဖြစ်တဲ့ သရဲ တစ္ဆေ နာနာဘဝ ဆိုတာကို မရှိဘူးလို့ ကာလအတန်ကြာ ယုံကြည်စွဲမှတ်ထားခဲ့သလို၊   ရှိတယ်ဆိုတာကိုပါ   တွေ့ကြုံခဲ့ရဖူးတော့  အဲဒါတွေနဲ့ ပတ်သက်ပြီး သတိရစရာတွေ ပေါ်လာခဲ့ပါတယ်။
            ငယ်ငယ်ကတည်းက အိမ်မှာ အတူနေတဲ့ အမေ့ရဲ့ အဒေါ်အပျိုကြီး( ကျမတို့ရဲ့ အဖွားလေး) တော်သူက ညည ပုံပြောပါဆို သရဲအကြောင်းဆီ ရောက်သွားတာပါပဲ။ အဲဒီအခါ ကျမတို့မောင်နှမတွေ စောင်ခေါင်းမြီးခြုံပြီး အိပ်ကြတော့တာ။  အဖေက သိတော့ 
 " မမ ကလေးတွေကို စိတ်အားငယ်အောင် သရဲအကြောင်း ဘယ်တော့မှ မပြောပါနဲ့" လို့ တားပါတယ်။ 
 
အဖေက နယ်မှာ တာဝန်ကျနေတဲ့ အတွက် ခွင့်နဲ့ ရန်ကုန်အိမ်ကို ပြန်လာတိုင်း သရဲ တစ္ဆေဆိုတာ တကယ်မရှိတဲ့ အကြောင်း၊ ကလေးတွေကို ကြောက်အောင် လန့်အောင် ချိန်းခြောက် ပြောတာ ဖြစ်တဲ့ အကြောင်း ၊ အဲဒါတွေ ယုံစရာ မလိုတဲ့အကြောင်း မကြာခဏ ပြောပါတယ်။
 တခြား မောင်နှမတွေတော့ ဘယ်လိုနေတယ်မသိ၊ ကျမက အဖေ့ကို အထင်ကြီးတဲ့သူ၊ အဖေက ခေတ်ပညာတတ်ဖြစ်တဲ့ အတွက် ခေတ်မီတဲ့ အတွေးအခေါ်ရှိတဲ့  အဖေ့ကို အထင်ကြီးသူပီပီ အဖေ့လိုပဲ သရဲဆိုတာ မရှိ၊ မယုံတဲ့ဘက်က ဖြစ်ပီး လုံးဝ သရဲတစ္ဆေမကြောက်ပါ။ ( အဲဒီတုန်းကပါ) 
              အမေကတော့ သရဲကို အသည်းအသန် ကြောက်တဲ့သူတစ်ယောက် ဖြစ်နေပါတယ်။ ညဖက်ကို အပေါ်ထပ်မှာ သောက်ရေက အစ အိုးနဲ့ယူတင်ထားပြီး အပေါ့အပါးတောင် မဆင်းပါဘူး။ မတတ်သာလို့ ဆင်းရရင် သားသမီးတွေထဲက တစ်ယောက်ယောက်ကို နှိုးပြီး အဖော်ခေါ်ပါတယ်။ တခါးကို မပိတ်ပဲ ဖွင့်ထားလိုက်ပါသေးတယ်။ ကျမက အမေ့ကို ဒီလောက်ကြောက်ရလား၊ ဒါ အဖွားတို့ လက်ချက်ပဲလို့ တွေးလိုက်ပါသေးတယ်။   
         အဖွား(အမေ့ရဲ့အမေ) က တရားသမားပါ။ ကျမက အမေ သရဲကြောက်တာနဲ့ ပတ်သက်ပြီး ရီစရာ လုပ်ကာပြောယုံမက သရဲ တစ္ဆေကို အယုံအကြည် မရှိကြောင်း ပြောတော့ အဖွားက ရှိတယ်ဆိုတာကို တရားသဘောတွေနဲ့ တမလွန်အကြောင်းတွေပါ ပြောပြတတ်ပါတယ်။ အတင်းအကျပ် ယုံဖို့တော့ မပြောပါ။ ဒါပေမယ့် ပထမဆုံး ကျမဘဝမှာ သရဲတစ္ဆေ ဆိုတာ တကယ်ရှိမရှိ ကိုယ်တိုင် တွေးတောရမယ့် ဆင်ခြင်ရမယ့် အချိန်ကို ရောက်လာခဲ့ပါတယ်။ ကျမ လေးတန်းနှစ်မှာ ကြုံခဲ့ရတဲ့ အဖြစ်အပျက်ပါ။                       
အမေက ကျမတို့ မောင်နှမတွေကို ည(၈)နာရီအထိ စာကြည့်ခိုင်းပါတယ်။ မောင်နှမတွေက အောက်ထပ်မှာ စာကြည့်ပြီး (၈)နာရီထိုးတာနဲ့ မီးမှိတ်ပြီး အပေါ်ထပ်ကို တက်ရတယ်၊ အဲဒီနေ့က အားလုံးက လှေကားမှာ တစ်ထစ်ချင်းရပ်ပီး နောက်ဆုံးကျန်တဲ့သူ မီးမှိတ်တာကို စောင့်၊ မီးလည်းမှောင်ရော ဝေး ဆို အော်ပီး သရဲ သရဲ လို့ဘယ်သူက စအော်တယ်မသိ အကုန်လုံး အလုအယက် အပေါ်ထပ်ကို တက်ပြေးကြတာ ဒုံး ကနဲအသံနဲ့အတူ စူးစူးဝါးဝါး ငိုသံကြားတော့မှ တစ်နှစ်လောက်ပဲ ရှိသေးတဲ့ အငယ်ဆုံးမောင်လေးကို သတိရတော့တယ်။ သူက မအိပ်သေးပဲ စာကြည့်နေတဲ့ အကြီးတွေကြားမှာ လာဆော့ရာက ကဲ အပေါ်တက်မယ်ဆိုတော့ သူ့ကလည်း လှေကားမှာ လေးဘက်ထောက် ရပ်နေခဲ့တာ။ ရုတ်တရက် သရဲ ဆိုတော့ လန့်ပီး သူ့ကို မေ့သွားကြတာ၊  အမေဆင်းလာပြီး ကြည့်တော့  မောင်လေးရဲ့ မေးစေ့မှာ သွေးတွေကရဲနေပြီး ရင်ဘတ်ပေါ်မှာပါ စိုရွှဲနေတော့တာ၊ အိမ်နီးချင်း တစ်ချို့ ရောက်လာပြီး ဆေးခန်းသွားမှ ဖြစ်မယ်၊ ဒဏ်ရာများတယ်ဆိုတော့မှ ဆေးခန်းပိတ်ချိန် ဖြစ်နေပြီ။  အဲဒီခေတ်ကာလက  ကျမတို့နေတဲ့ သုဝဏမှာ ဆရာဝန်တစ်ယောက်မှ မရှိ။ ရန်ကုန်မြို့ထဲက ဆရာဝန်တစ်ယောက်က ဆေးခန်း လာဖွင့်တာပဲ ရှိတယ်။ သူက မြို့သစ်မှာဆိုတော့ သွားရပြန်တာ မှောင်ပီး လမ်းကလဲ ချောင်ကျတဲ့အတွက် ည(၈)နာရီ အထိပဲ ဖွင့်ပါတယ်။ ဒါပေမယ့် လူနာရှိရက်နဲ့တော့ ၈နာရီဒေါင်ကနဲ ဆိုတာနဲ့ ပိတ်တာတော့ မဟုတ်ပါဘူး။ လူနာရှိနေရင်  ကုပေးတဲ့ အတွက် ဆရာဝန် ရှိနိုင်ပါသေးတယ်။ ဒါနဲ့ အမေက ကလေးချီပြီး ကျမက အနောက်က အဖော် လိုက်သွားရပါတယ်။ အိမ်ကထွက်တော့ ညာဖက်ကိုထွက်မယ် အလုပ် အမေက " လမ်းကြားလေးက သွားမယ် ဒါမှ ဆရာဝန်မီမှာ" အင်မတန် သရဲကြောက်တတ်တဲ့ အမေက အဲဒီက သွားမယ်ဆိုတော့ အံ့ဩသွားပါတယ်။အဲဒီ" လမ်းကြားလေး" လို့ ရပ်ကွက်ထဲက လူတွေ ခေါ်တဲ့လမ်းက အင်မတန် အသုံးတဲ့ပါတယ်။ သူက တိုက်နှစ်တိုက်ရဲ့ နောက်ဖေး လမ်းကြားပါ။  ကျမတို့တိုက်က ညာဖက်ကို အတွင်းလမ်းအတိုင်း ၅မိနစ် လျှောက်ရင် လမ်းမကြီးပေါ် ရောက်ပါတယ်၊ အဲဒီလမ်းမကြီးအတိုင်းအဲလိုပဲ ၅မိနစ်လောက် သွားပြီးမှ  ညာဖက်ထပ်ချိုးရသေးတယ်။ အဲဒီ လမ်းမကြီးပေါ်မှာ လည်း (၁၀)မိနစ်လောက် လျှောက်ပြီးမှ ဆေးခန်းရှိတဲ့ လမ်းမပေါ် ရောက်တာပါ။ လမ်းကြားလေးက အိမ်ကနေ ဖြတ်ကနဲဘယ်ဘက် ကွေ့လိုက်ရုံနဲ့ေ၇ာက်ပြီး ၅ မိနစ်လောက်ပဲ လျှောက်တာနဲ့ ဆေးခန်းရှိတဲ့ လမ်းမကြီးပေါ် ရောက်သွားတာပါ။ ဒါပေမယ့် အဲဒီလမ်းကြားလေးဟာ သရဲခြောက်တာ နာမည်ကြီးလို့ ညနေမှောင်ရီပျိုးတာနဲ့ ဘယ်သူမှ မဖြတ်ပါဘူး။ ကုန်ကုန်ပြောရရင် အရက်မူးသမားတောင် မဖြတ်ပါဘူး။ လမ်းမကြီးကပဲ ပတ်ပြန်ကြတာ။ နေ့ခင်းဆိုရင်တော့ လူမပြတ်ဘူး၊ အဲဒီလမ်းကြားလေးက ထွက်ရင် သုဝဏဈေးကြီး၊ ကားမှတ်တိုင် စတာတွေကို ချက်ချင်းရောက်တော့ လူသွားလူလာ များပါတယ်။ အဲဒီလမ်းကြားမှာ ရှိတဲ့ သရဲက နာမည်ပါရှိပါတယ်။ အခုတော့ မေ့နေပါပြီ။ အဲဒီ နာမည်များပြောရင် အင်မတန်ကြောက်ကြပါတယ်။ ထုံးစံအတိုင်း မျက်လုံးက ဘောလုံးလောက် လျှာက တစ်တောင်လောက်ရှိပြီး အရပ်ကြီးကလည်း ထန်းပင်လောက်ရှိတာပေါ့။ ပြောကြတာ။                အမေက ဆရာဝန်မမီမှာ စိုးရိမ်တာနဲ့ အဲဒီလမ်းက သွားပေမယ့် ကျမက နဂိုထဲက မယုံတဲ့သူဆိုတော့ စိတ်ထဲကနေ တွေးလိုက်ပါသေးတယ်။ သရဲရှိတယ်ဆိုရင် ငါတို့ အခု ခြောက်မှာပေါ့ ။ အခုတော့ ရှင်းလို့ လင်းလို့ တွေးနေမိပါသေးတယ်။ နောက်ဖေး လမ်းကြားဆိုပေမယ့် လမ်းက ကွန်ကရစ်လမ်းပါ။ လမ်းရဲ့အလည်ဗဟိုမှာ မီးတိုင်တစ်ခု ရှိတော့ အဲဒီက အလင်းက လမ်းကြားလေးကို လင်းနေပေမယ့် လမ်းအစနဲ့အဆုံးကတော့ အလင်းမှိန်မှိန်ပဲ ရပါတယ်။ လမ်းရဲ့ အကျယ်က ၃ပေ  လောက်ရှိမယ်ထင်ပါတယ်။ လူနှစ်ယောက် ယှဉ်ပီး လျှောက်လို့မရပါဘူး။ ရှောင်ရင်လည်း တစ်ယောက်က ရပ်ပီး ဖယ်ပေးမှ ရပါတယ်။ အဲဒီလမ်းကို ကွန်ကရစ်ခင်းပီး လမ်းမီးတိုင် တစ်ညလုံး ထွန်းပေးတဲ့ အလှုရှင်က ကျမတို့အိမ်နဲ့ကပ်ရက်က အန်တီတစ်ယောက်ပါ။ လမ်းကြားလေးက ညဖက်ပေမယ့် လမ်းကဖြူးပီး အလင်းရောင်ရပါတယ်။ အရှည်ကတော့ သေချာအတိအကျ မသိပေမယ့် တိုက်ခန်းတွဲ(၈)ခန်းကို ဖြတ်ရပါတယ်။ နဲနဲတော့ ရှည်ပါတယ်။             အမေက ကလေးနဲ့အရှေ့က ခပ်သုပ်သုပ်လျှောက်၊ ကျမက အနောက်က လိုက်ရင်းနဲ့ ရုတ်တရက် အနောက်မှာ လူတစ်ယောက်ကပ်ပါလာတာ သတိထားလိုက်မိပါတယ်။ အနောက်မှာ နီးနီးလေး ကပ်ပါလာတော့ အဖော်ရဘီဆို လှည့်အကြည့်မှာ အဲဒီလူက လမ်းရဲ့အစကို ပြန်ရောက်ပီး ရပ်နေတာ တွေ့လိုက်ရပါတယ်။ ဦးလေးကြီး တစ်ယောက်ပါ။ အဖေတို့လောက်လဲ မကြီး၊ ကျမ အသက်နဲ့ယှဉ်လိုက်တော့ အသက် အစိတ် လောက်ဆိုတော့ ဦးလေးကြီးတစ်ယောက်လို့ ပြောတာပါ။ ရှပ်အကျ င်္ီအဖြူရောင်မှာ လက်ကို ခေါက်ထားတာပါ မှတ်မိလိုက်ပါတယ်။  စိတ်ထဲက မသွားတော့ပဲ လှည့်ပြန်မလို့ ထင်တယ်လို့ တွေးလိုက်ပါတယ်။ ဒါနဲ့ ဆက်လျှောက်တော့ အနောက်မှာ နီးနီးလေး ကပ်လျှောက်နေပါတယ်။  လှည့်ကြည့်လိုက် အနောက်ရောက်သွားလိုက်၊ ပြန်လျှောက်လိုက် အနားရောက်လာလိုက်နဲ့ ဖြစ်ဖြစ်နေတော့ စိတ်ထဲမှာ တို့သားအမိလျှောက်တာ နှေးလို့ ကျော်တက်ချင်လို့လား မသိလို့ တွေးရင်း" အမေ အနောက်မှာ လူတစ်ယောက်ပါလာတယ် ဖယ်ပေးလိုက်အုန်း ကျော်တက်မလို့လား မသိဘူး" ဆိုတော့ အမေက လှည့်ကြီးပြီး " ဟင် ဘယ်မှာလဲ ဘယ်သူမှမရှိပါလား ကဲဟယ်" ဆိုပီး ကျမခေါင်းကို ဒေါင်ကနဲ နေအောင် ခေါက်ထဲ့လိုက်တာ ပူထူသွားတာပဲ။ တစ်ဆက်တည်းပဲ " ကြောက်ရတဲ့ ကြားထဲ ဘာတွေလျှောက်ပြောနေတာလဲ မြန်မြန်လာ" ဆိုပီး အပြေးသုတ်ခြေတင်တော့မှ ကျမလဲ ပြေးလိုက်ရပါတယ်။ စိတ်ထဲမှာ သေချာတွေ့လိုက်တာ လူပါ အကျ င်္ီအဖြူနဲ့ ဘယ်ရောက်သွားပါလိမ့် လို့ တွေးမိနေပါတယ်။ ဆေးခန်းရောက်တော့ လူနာတစ်ယောက်မှမရှိတော့ပဲ ဆရာဝန်က ဆေးအိတ်သိမ်းပြီးလို့ ပြန်ဖို့တံခါးဝ ရောက်နေပေမယ့် ကုပေးပါတယ်။ ကံကောင်းပီး မချုပ်ရပဲ သောက်ဆေး ပေးပါတယ်။ ဆေးခန်းက ပြန်လာတော့ လမ်းကြားလေး ထိပ်ရောက်တော့ ကွေ့မယ်အလုပ် အမေက
 "လမ်းမတန်းက ပြန်မယ်" တဲ့   
              နောက်တစ်နေ့လဲ ရောက်ရော အမေ့ကို သတင်းလာမေးကြတာ အများကြီးပဲ၊ မောင်လေး မေးစေ့ကွဲသွားတာ မေးတာမဟုတ်ပဲ သူတို့ မေးကြတာက 
'" ပြောပါအုန်း ညက လမ်းကြားလေးမှာ သရဲခြောက်ခံရလို့ဆို" တဲ့
ကျမလဲ ဇဝေဇဝါ ဖြစ်သွားပီး သရဲမဟုတ်ပါဘူး လူပါ၊ လူမှ လူအစစ် ဦးလေးကြီးတစ်ယောက် ရှပ်အကျ င်္ီအဖြူနဲ့လို့ ဝင်ပြောတော့ လူကြီးတွေက အမလေး တပြီး ကြောက်တဲ့ အကြောင်းပဲ ဆက်ပြောနေကြတာပါပဲ။
                   ကျမ အထက်တန်းကျောင်း တက်တဲ့ အချိန်၊  ဖွံ့ဖြိုးရေး အချိန်မှာ ဆရာက ဒီနေ့တော့ နာနာဘဝဆိုတာ တကယ်ရှိလား မရှိဘူးလား ဆိုတာ ပြောကြရအောင်တဲ့၊ တစ်ဆက်တည်းမှာပဲ ယုံတဲ့သူလက်ထောင်၊ မယုံတဲ့သူ လက်ထောင်ဆိုပီး ထောင်ခိုင်းတော့ ကျမက ဘယ်ဘက်ကမှ မထောင်တာ တွေ့တော့ ဘာလို့လဲ မေးပါတယ်။ ကျမ လေးတန်းအရွယ်က အမေနဲ့ကြုံခဲ့တဲ့ အဖြစ်အပျက်ကို ပြောပြပီး
 " ဆရာ အဲဒါ ဘယ်လိုထင်လဲ တကယ်ပဲ သရဲဆိုတာလား" လို့
 မေးခွန်းထုတ်ခဲ့တာ မှတ်မိပါသေးတယ်။

ဒါပေမယ့် တစ္ဆေသရဲ တကယ်ရှိတယ် မရှိဘူး၊ သရဲဆိုတာ အကျ င်္ီဝတ်နဲ့လည်း ရှိတယ်ဆိုတဲ့ အဖြေအတိအကျကို မရခဲ့သေးပါဘူး။ တကယ်တန်း ကြုံခဲ့ရတော့ ဝန်ထမ်းဘဝမှာ ဖြစ်နေပါတယ်။ အသက်လဲ (၃၀)ကျော်တဲ့ အချိန်မှာပါ။ အဲဒီကစလို့ ပထမ သရဲဆိုတာ နာနာဘဝဆိုတာကို အင်မတန်ကြောက်၊ ကြောက်ရာကနေ ကြောက်စရာမကောင်းတဲ့ အခြေအနေအထိ ကြုံခဲ့ရပါတယ်။
                မြန်မာ့အသံ(ပြည်လမ်း) အသံလွှင့်ရုံကို ၁၉၅၄ခုနှစ် ဖေဖော်ဝါရီလ(၁၂) ရက်နေ့မှာ အုတ်မြစ်ချပြီး စတင်တည်ဆောက်ပြီးတဲ့နောက်  ပြည်လမ်းမှာ အသံလွှင့်ပါတယ်။ မြေဧက(၁၄.၂၄၃) အကျယ်မှာ အသံလွှင့် အဆောက်အဦရဲ့ အကျယ်က ( ၉၃၇၇၁) စတုရန်းပေ ရှိပါတယ်။ အဲဒီတုန်းက ရုပ်မြင်သံကြား အဆောက်အဦ မဆောက်ရသေးပါဘူး။ အဲဒီ အသံလွှင့်ရုံ စတည်တော့ ကျမတို့ မွေးတောင်မမွေးသေးပါဘူး၊ ဒါပေမယ့် အသံလွှင့်ရုံမှာ အလုပ်စဝင်ကတည်းက မှတ်သားရတဲ့ ဆောင်ရန်၊ ရှောင်ရန် ဝန်ထမ်းစည်းကမ်း။ လုပ်ငန်းနဲ့ ပတ်သက်တဲ့ နည်းစနစ်တွေအပြင် ပိုပိုသာသာ ထပ်သိပြီး၊ လူသိများတာက သရဲခြောက်ပါသတဲ့၊

သရဲက နာမည်နဲ့ဘာနဲ့ အတိအကျပါ၊ " မနီ" တဲ့။
              ကြားရသလောက်ဆို သူ့နာမည်အရင်းမဟုတ်လောက်ပါ။  ဝန်ထမ်းအဆက်ဆက် ပြောကြတာကတော့ အဲဒီ အသံလွှင့်ရုံ အသစ်ကြီး ဆောက်ပြီး ဖွင့်ကာနီးမှာ  ဘိလပ်မြေသယ်တဲ့ မိန်းကလေးတစ်ယောက်က တိုက်ပေါ်က ပြုတ်ကျပြီး သေဆုံးသွားပါတယ်။ အဲဒီနေ့က သူက အနီရောင် ဝမ်းဆက် ဝတ်ထားတာဖြစ်သတဲ့၊ နောက်ပိုင်းမှာ အသံလွှင့်ခန်းကနေ ရုံးခန်းဘက်အသွား အကွေ့တို့၊ ချောင်ကြတဲ့ အခန်းနား ဖြတ်လျှောက်သွားတဲ့ သူတွေက အနီရောင်ဝမ်းဆက်နဲ့ ကောင်မလေးကို တွေ့ကြသတဲ့၊  ဒါနဲ့ တခုခုဆို မနီ နဲ့တွေ့နေမယ် သတိထားသွား ပြောကြ ဆိုကြရာက မနီ သရဲ နာမည် ကြီးလှပါတယ်။ အဲဒီ အချိန်က သရဲ တစ္ဆေ မယုံတဲ့ ကျမက အဲဒီအကြောင်း လာပြောရင် အဲဒီ မနီက ၁၉၅၄ထဲက အခုထိ သရဲဘဝနဲ့ နေနေတုန်းပဲ အံ့ပါ့ လို့ ပြန်ပြောတတ်ပါတယ်။ မနီသရဲ ဘယ်လောက်နာမည်ကြီး သလဲဆိုရင် မြန်မာ့အသံဝန်ထမ်း လုပ်ခဲ့ဖူးသူမှန်သမျှ ရာထူးအကြီးဆုံးဖြစ်တဲ့ ညွှန်ချုပ်နာမည်တွေသာ မေ့သွားမယ်၊ မနီ နာမည်ကိုတော့ မမေ့ကြပါဘူး၊ အခြောက်မခံရဘူးတောင် နာမည်နဲ့ အတော်လေး ကြောက်ကြရတာကိုး။
              ကျမတို့ ရေဒီယိုစက်မှုတာဝန်ခံ အမကြီးက အင်မတန်ထက်မြက်တဲ့သူ ဖြစ်ပါတယ်။ အမျိုးသားတွေနဲ့ရင်ဘောင်တန်းပြီး အလုပ်လုပ်နိုင်ယုံမကဘူး လုပ်ငန်းကိစ္စတွေမှာ အင်မတန်ကျွမ်းကျင်ပါတယ်။ ဖောင်ကြီးသင်တန်းတက်တာမှာတောင် စံပြထူးချွန်ဆု ပထမ ရခဲ့သူပါ။ ဒါပေမယ့် အသံသွင်းတဲ့ စတူဒီယို အခန်းကို ပထမဆုံး သော့ဖွင့်ဝင်ရမယ်ဆို တစ်ယောက်တည်း ဘယ်တော့မှ မသွားပဲ အဖော်အမြဲ ခေါ်တတ်ပါတယ်။ ပါးစပ်ကလဲ ပြောပါတယ်။
 " သရဲတော့ ကြောက်တယ်" တဲ့။
  ကျမတို့ အချင်းချင်း မရှိဘူး၊ ရှိတယ်၊ စိတ်ထင်တာ၊ ဘာညာ စသဖြင့် ငြင်းကြတဲ့အခါ အနောင်စာ တစ်ယောက်က ကျမကို ဦးတည်ပီး မယုံဘူးဆိုရင် ပြောပြမယ်ဆိုပီး သူသိတာ ပြောပြပါတယ်။               တစ်နှစ်မှာ တောင်တန်းသာသနာပြုဆရာတော်ကြီး မြန်မာ့အသံမှာ အသံသွင်းဖို့ ကြွလာပါတယ်တဲ့၊ ပြီးတဲ့အခါ အသံလွှင့်တဲ့အခန်းတွေ မြန်မာ့အသံထဲ လှည့်ပီး ပြတဲ့အခါ ရေဒီယို စက်ခန်းထဲကို ရောက်လာပါတယ်တဲ့။ အဲဒီအခါမှာ ဆရာတော်ကြီးက နှုတ်ကနေ အသံလေးထွက်ပြီး
 " အော်  သနားစရာတွေပါလား၊ အများကြီးပဲ" မိန့်သတဲ့၊
 အနားက လူကြီးတွေက
" နှစ်ဆန်းတစ်ရက်ရောက်တိုင်း တပည့်တော်တို့ ပရိတ်အမြဲ ရွတ်ပေးပါတယ် ဘုရား"  လို့ လျှောက်သတဲ့။ပြန်ပြောတဲ့ အနောင်စာက သူက အနောက်မှာ လက်အုပ်လေးချီပီး ကြားခဲ့တာတဲ့။                မင်းကွန်းဆရာတော်ကြီးရဲ့ မေတ္တာပို့မှာ မြင်အပ်မမြင်အပ် နှစ်ရပ်များစွာ သတ္တဝါ ချမ်းသာကိုယ်စိတ်မြဲပါစေ၊ ဆိုတာ ဒါတွေကို ရည်စူးတာပဲ၊ ဒါဆို မမြင်ရတဲ့ ပရလောကသားတွေ ဆိုတာ ရှိတာပေါ့လို့ အသိရပါတယ်။                ကျမတို့ အလုပ်ဝင်နေတဲ့ ကာလမှာတော့ ဟိုနေရာမှာ ခြောက်ပြန်ပြီ၊ ဟိုလူတော့ အခြောက်ခံရပြန်ပြီ ကြားနေပေမယ့် ကြိုးကြား ကြိုးကြားပါပဲ၊ နောက်ပိုင်း ဆက်တိုက် ခြောက်တာကတော့ မြန်မာ့အသံကို နေပြည်တော်ကိုေ၇ွှ့မယ့်အစီအစဉ် စတဲ့ အချိန်မှာ သရဲခြောက်တယ် ဆိုတာနဲ့ အခြောက်ခံရသူတွေ စိတ်စိတ်လာပါတယ်။ ဝန်ထမ်းတွေလည်း ရန်ကုန်က မခွာချင်သူတွေ၊ မိသားစုနဲ့ခွဲနေလို့ မရသူတွေက လိုက်ပြောင်းရမလား၊ အလုပ်ကပဲ ထွက်လိုက်ရမလား စိုးရိမ်တာတွေ ဖြစ်ကြပြီး လူစုမိတာနဲ့ ဘယ်လိုလုပ်ကြမလဲ၊ တရပ်တကျေးမှာ အဆင်ပြေပါ့မလား၊ ခွဲနေရင်ရော ရတာနဲ့ကုန်တာလောက်ငပါ့မလား ပြောကြတာ ဝန်ထမ်းတွေအကြား အတော်လေး လှုပ်လှုပ်ခပ်ခပ် ဖြစ်ကြပါတယ်။
            ပရလောကသားဖြစ်တဲ့ သရဲတွေလည်း ဒီအဆောက်အဦကြီးမှာ နေလာရာက သူတို့လဲ မှီတွယ်ရာ မရှိတော့မှာ စိုးရိမ်ပြီး ကျွတ်ချင် လွတ်ချင်ဟန်တူပါတယ်၊ အဆောက်အဦကြီးကို ဖြိုချပြီး အသစ်ဆောက်မလို၊ ရောင်းစားမလို ကောလဟလတွေကလည်း မျိုါ်စုံ ထွက်နေတော့ သရဲတွေပါကြားပြီး စိုးရိမ်နေကြသလား မပြောတတ်။ ရက်ဆက်ဆိုသလို ခြောက်တယ် တွေ့တယ်ဆိုတဲ့ အသံတွေ ကြားနေရပါတော့တယ်။
             ကျမနဲ့ဆုံရတဲ့ သရဲကတော့ လျှာတစ်တောင်လောက် အရမ်းထန်းပင်လောက်လို့ ပြောကြတဲ့ ကြောက်စရာရုပ်မဟုတ်ပေမယ့် အသက်ထွက်မတ် ထိတ်လန့်ခဲ့ရတာ ပြောပြပါအုန်းမယ်။
မောနင်းဂျူတီလို့ ခေါ်တဲ့ မနက်စောစော ဂျူတီဝင်ရမယ်ဆို ကျမက ဌာနနဲ့နီးတဲ့ နေရာမှာ နေတဲ့ အတွက် ဖယ်ရီမစီးပဲ  အိမ်ကနေ လမ်းလျှောက် သွားပါတယ်။ မိနစ်(၂၀)ဆို ရုံးရောက်ပါတယ်။ နံနက်(၇)နာရီမှာ အသံစလွှင့်ျနိုင်ဖို့ အတွက် နံနက် ၆နာရီခွဲကို နောက်ဆုံးထားပြီး စက်ပိုင်းဆိုင်ရာနဲ့ အသံလွှင့်မယ့်အခွေတွေကို အသင့်ပြင်ထားရပါတယ်။ ဒါ့ကြောင့် ၆နာရီအရောက် စက်ခန်းကို အရောက်သွားရပါတယ်။ အိမ်ကနေ ၆နာရီထိုးဖို့ ၁၅မိနစ်အလို၊ တခါတလေ ၅နာရီခွဲပီး ဆယ်မိနစ်ဆို ထွက်ရပါတယ်။ အဝေးမြို့နယ်က အလုပ်ဆင်းတဲ့ သူတွေက ဖယ်ရီကားပေါ်မူတည်ပီး ရောက်ကြပါတယ်။ အိမ်နီးတဲ့သူက စောစော ကြိုသွားထားရင် ပိုပီး စိတ်ချရပါတယ်။
 ကျမက အလုပ်ကို သွားတိုင်း အကျင့်တစ်ခု လုပ်ထားတာရှိပါတယ်။ အိမ်ကနေ စခြေလှမ်းတာနဲ့ သံဗုဒေဂါထာကို စပြီးရွတ်တာ အသံလွှင့်ရုံဝင်းတံခါး အရောက်ကို ကျမရဲ့ သက်စေ့ အတိအကျပါပဲ။ အဲဒီလို အတိအကျရွတ်တာ ကိုယ့်ဘာသဘောကျပီး အမြဲရွတ်ပါတယ်။ အဲဒီနေ့ကလဲ ထုံးစံအတိုင်း ရွတ်ဖတ်လာပြီး အဆောက်အဦထဲ အရောက်မှာ ဘယ်အခန်းမှ မီးရောင် မတွေ့ရပါဘူး။ ဖယ်ရီတွေ တစ်စီးမှ မရောက်သေးတာ ဖြစ်တဲ့ အတွက် ကိုယ့်မှာ ပိုတာဝန်ကြီးတဲ့အတွက် နောက်ကျခဲ့ရင် ဆိုတဲ့ အတွေးနဲ့ လုံခြုံရေး ရုံးခန်းမှာ သော့သွားထုတ်ပါတယ်။ သတင်းစာပါ တစ်ပါတည်းယူပြီး စက်ခန်းဘက်ကို ထွက်ခဲ့ပါတယ်။ ကော်ရစ်ဒါ မီးရောင်ကို အားပြုပြီး ရေဒီယိုစက်ခန်းရဲ့ ပင်မတံခါးကို ဖွင့်ပါတယ်။
            ဂျူတီ shift တစ်ခုမှာကျမတို့ စက်မှုဘက်က  ဝန်ထမ်း(၃)ယောက် ရှိပါတယ်။ အသံလွှင့်တဲ့ အခန်းမှာ အနောင်စာနဲ့အတူ ကြေညာတဲ့ သီချင်း၊ အစီအစဉ်တွေကို တစ်ပြိုင်တည်း လွှင့်ပေးရတဲ့ ဝန်ထမ်းက(၂) ယောက်နဲ့ အပြင်ဘက်က master control အခန်းမှာ ကြီးကြပ်သူက တစ်ယောက်ပါ။ ကျမက master control မှာ တာဝန်ကျတဲ့ အဲဒီနေ့ရဲ့ စက်မှုဘက်ဆိုင်၇ာ ကြီးကြပ်သူပါ။ အဲဒီမတိုင်ခင် ရက်က day ဂျူတီ ဆင်းရပါတယ်။ အဲဒီဂျူတီက အသံသွင်းတဲ့ရက် recording လုပ်ပေးရတာပါ။ အသံလွှင့်ဂျူတီကျတဲ့ ရက်က ခွင့်ယူဖို့ မလွယ်ပါဘူး၊  ဂျူတီချိန်းပြီး လူစားရှာရတာများပါတယ်။ ကျမတို့နဲ့အတူဆင်းရမယ့်သူထဲက ကို..........က မနက်မှာ ဖယ်ရီနဲ့လိုက်မလာနိုင်တဲ့ အကြောင်း တိုးတိုး လာပြောရှာပါတယ်။ " နောက်ကျမှ ရောက်နိုင်မယ် ၊ (၈) နာရီလောက် ရောက်အောင် လာခဲ့ပါမယ်"လို့ ခွင့်တိုင်ပါတယ်။ ဒါက ကျမခွင့်ပြုလို့ရတာမဟုတ်ပါဘူး။ သူနဲ့အတူ အသံလွှင့်ရမယ့်ဝန်ထမ်းကလဲ ကြည်ဖြူမှရတဲ့အတွက်

" မ........ကို ပြောလိုက်ပါ။ ကို............ မေ၇ာက်ခင် သူတာဝန်ယူနိုင်မလား၊ သူတစ်ယောက်ထဲ ဖြစ်သလား" ဆိုတော့
" ကျတော်တို့ချင်း ပြောပြီးပါပြီ။ အဆင်ပြေပါတယ်။" ကျမဆီက ခွင့်တောင်းတာပါတဲ့။
သူက သူနောက်ကျမယ့် အကြောင်းကို အသေးစိပ် ပြောပြနေပါတယ်။ ဝန်ထမ်းတွေက ရတဲ့ လခနဲ့ မလောက်ငတဲ့ အတွက် အပြင်မှာ ဝင်ငွေ ရှာရပါတယ်။ အထူးသဖြင့် အိမ်ထောင်ဦးစီးဖြစ်တဲ့ အမျိုးသားဝန်ထမ်းတွေဆို ပိုဆိုးပါတယ်။ သူက အပြင်မှာ သူတတ်တဲ့ ပညာနဲ့စလောင်းလိုက်ဆင်ပါတယ်။ တီဗွီ စလောင်း အိမ်တွေမှာ လိုက်ပြင်ပါတယ်။ ဝယ်ဖို့ခေါ်ရင်လဲ စက်ပစ္စည်း နားလည်တဲ့သူအနေနဲ့ လိုက်ပေးပါတယ်။ အဲဒီလိုနည်းနဲ့ အပိုငွေရအောင် ရှာရပါတယ်။ သူ့အိမ်မှာ ဒီညတစ်ညလုံး တီဗွီတစ်လုံးပြင်ပေးရမှာ၊ နောက်နေ့ပေးမှ ငွေရမှာမို့ အပီးပြင်ချင်လို့ နောက်ကျမယ့် အကြောင်း ပြောပါတယ်။ အဆင်မပြေတဲ့ သူတွေဆို ဒီလိုပဲ အချင်းချင်း ညှာနေကြရတာဆိုတော့ ခေါင်းညိတ်ရတာပါ။ တရားဝင်တော့ မဟုတ်ပါဘူး၊ လူကြီးတွေ သိရင် ဥပဒေတွေ စည်းမျဉ်းတွေနဲ့ အတိအကျ ကိုင်ပေါက်ခံရပေမယ့်၊ ဒီလိုပဲ ကိုယ့်ဝန်ထမ်းအချင်းချင်း ကြည့်လုပ်ကြတာပါ။          အသံလွှင့်မယ့်အခန်းမှာ ဂျူတီကျတဲ့ (၂)ယောက်မှာ တစ်ယောက်က မရောက်နိုင်တာ သေချာပြီးသား၊ အဲဒီမှာ နောက်တစ်ယောက်က ဖယ်ရီမဝင်သေးတဲ့အတွက် ကိုယ်တစ်ယောက်တည်း လုပ်စရာ များတာမို့ ခပ်သုတ်သုတ်ပဲ ဝင်ဖို့လုပ်ရပါတယ်။ အသံလွှင့်ခန်းထဲက အခွေစစ်တာ စဉ်တာ ကိုယ့်အလုပ်မဟုတ်ဘူး၊ သူတို့ရောက်မှ လုပ်ပစေလို့ ပစ်ထားလို့မရပါဘူး၊ ရောက်တာမရောက်တာ နောက်ထား၊ မနက်(၇)နာရီထိုးရင် အသံထွက်ဖို့က အရင်မို့ သူ့အလုပ်ကိုယ့်အလုပ် ခွဲခြားမနေပဲ လုပ်ပေးကြတာ ဝန်ထမ်းတိုင်းပါပဲ။          လုံ့ခြုံရေးအခန်းကနေ ထုတ်လာတဲ့ သော့တွေက ပင်မတံခါးသော့ရယ်၊ အဲဒီပင်မတံခါးကနေ ဝင်အပီးမှာ ဝင်ရတဲ့  master control အခန်းသော့ရယ် ၊ master control အခန်းကိုဝင်အပြီးမှာ အထဲက အခန်းငယ်တစ်ခန်းထဲမှာ မှန်ပုံးနဲ့ စတူဒီယိုအားလုံးရဲ့ သော့တွေကို သော့ခပ်ထားတာ ဖွင့်ဖို့ သော့ရယ် (၃)ချောင်းပါ။ ၈ပေလောက်မြင့်ပီး တစ်လက်မခွဲလောက်ထုရှိတဲ့ ပင်မမှန်တခါးကို ကော်ရစ်ဒါမီးရောင်နဲ့ ဖွင့်ဝင်အပီးမှာ နံရံမှာ မြှုတ်ထားတဲ့ မီးခလုတ်ကို အမှောင်ထဲမှာ ကျင့်သားရနေတဲ့ အတွက် ဖွင့်လိုက်ပါတယ်။ စက်ခန်းရဲ့ တစ်ဝက် မီးလင်းသွားမို့master control အခန်းဘက်ကို လျှောက်လာစဉ်မှာပဲ မှန်တွေပဲ ကာထားတဲ့ အဲဒီအခန်းထဲမှာ လူတစ်ယောက် ထိုင်ပြီး သတင်းစာဖတ်နေတာတွေ့ပါတယ်။ ကျမထိုင်တဲ့ မျက်နှာချင်းဆိုင်ခုံမှာပါ။ ပုံစံကလဲ အတိအကျပါပဲ ခပ်ဝဝဖိုင့်ဖိုင့်ပါ။ ရှပ်အကျ င်္ီနဲ့ပုဆိုးနဲ့ပါ။ ဒါနဲ့ကျမလဲ စိတ်ထဲက
 " အမယ် ကို............က နောက်ကျမယ်ဆိုပီး ငါ့ထက်တောင် စောရောက်နေပါလား"
တွေးရင်း ဝမ်းသာသွားပါတယ်။ စိတ်အေးသွားပါတယ်။ တစ်ဆက်တည်း သော့နဲ့တံခါးပေါက်ကို ထိုးပီးလှည့်ဖွင့်မိမှ
 " ဟင် ...... ငါက အခုမှ သော့ထုတ်လာပြီး ဖွင့်တာ သူက ဘယ်လို ရောက်... "
လို့ အတွေးပေါ်လာ တစ်စုံတခုဆိုတာ ချက်ချင်းအသိစိတ်ဖြစ် ချက်ချင်း တခါးလက်ကိုင်ဖုကို ကိုင်ထားပြီး ရပ်နေတုန်း နဲနဲလေးဟနေတဲ့ နေရာကနေ  ဝှီးကနဲ ဘာမှန်းမသိတာကြီး ဖြတ်သွားတော့မှ တကိုယ်လုံး တဆတ်ဆတ်တုန်နေတာ သတိထားမိပါတယ်။ ချက်ချင်းအသိဝင်လိုက်တာက အခန်းထဲဝင်ပြီး မီးဖွင့်ဖို့၊ အခန်းထဲဝင်ပြီး အမှောင်ထဲမှာ မီးခလုတ်ကို စမ်းရင်းဖွင့်လိုက်တော့ လေးပေမီးချောင်း(၄)ချောင်းရဲ့ အလင်းရောင်ကြောင့် ကြောက်စိတ်တွေ သက်သာသွားပါတယ်။ ဒါပေမယ့် လူက တစ်ကိုယ်လုံး တစ်ဆတ်ဆတ် တုန်နေတဲ့ အပြင် နှလုံးတွေက ပြုတ်ကျမတတ် လှုပ်ခါနေတဲ့ အတွက် သေတော့မလား လန့်ပီးသေမလားဆိုတာ တွေးလိုက်မိပါတယ်။ အဲဒီအချိန်မှာ အိမ်မှာ ကျမထွက်ခါနီး ပိုးလို့ပက်လက် အိပ်ပျော်နေတဲ့ ကလေးတွေရဲ့ ပုံကို ပြေးမြင်လိုက်ပါတယ်။ စိတ်ဆိုတာ အင်မတန်မြန်ပြီး တန်ခိုးရှိတာ အဲဒါကြုံမှ လက်တွေ့ပိုသိရပါတယ်။
" သေလို့ မဖြစ်ဘူး၊ ငါ့ကလေးတွေမသိပဲ ငါသေသွားရင် သူတို့ဘာမှ သိမှာမဟုတ်ဘူး သတိကပ် သတိကပ်"
ကိုယ့်ကိုယ်ကို သတိကပ်ပြီး အသက်ဝအောင် ခပ်ပြင်းပြင်းရှုပြီး ခုံမှာထိုင်ချပြီးတော့ အသက်ရှုတာ မှတ်လိုက်မှ ငြိမ်သွားပါတော့တယ်။ အဲဒီတော့မှ စက်တွေ ဖွင့်ဖို့လုပ်၊ မိန်းတင် ခလုပ်တွေ တစ်ခုပီးတစ်ခု ဖွင့် လုပ်ရပါတော့တယ်။  သော့တွေ ထပ်ထုတ်ဖို့ ကျန်သေးတဲ့ အပြင်  ဆက်ပြီး လုပ်စရာတွေ တသီတတန်းကြီး ရှိနေသေးပေမယ့် ပင်မစက်တွေ ဖွင့်ပြီးပြီမို့ ခန ထိုင်နေလိုက်ပါတယ်၊  ပင်မစက်တွေ ဖွင့်ထားပြီဆိုရင် ရေကူးထပ်ဆင့်လွှင့်စက်ရုံမှာ တာဝန်ကျနေတဲ့သူက ပြည်လမ်း အသံလွှင့်ရုံမှာ တာဝန်ကျတဲ့သူ ရောက်နေပြီဆိုတာ တက်စ်တုန်း မပို့ပေမယ့် သိနေပါတယ်။
တက်စ်တုန်းဆိုတဲ့ အသံမလွှင့်ခင် အသံရောက်မရောက် လိုင်းကောင်းမကောင်း စက်တွေ ပုံမှန်ဟုတ်မဟုတ်ကို စမ်းသပ်ပို့တဲ့ အသံက အသံလွှင့်ခန်း ကနေပို့ရမှာ ဖြစ်ပါတယ်။ အဲဒီနောက် ဖယ်ရီကား ဝင်လာပြီး အနောင်စာရောက်လာ၊ ကိုယ်နဲ့တွဲမယ့်  တာဝန်ကျသူပါ ရောက်လာမှ အလုပ်ဆက်လုပ်နိုင်ပါတော့တယ်။ ရောက်လာတဲ့ မိန်းကလေး(၂)ယောက်ကို သရဲခြောက်ခံရတာ မပြောပဲ နေလိုက်ပါတယ်။ သူတို့ပါ လန့်သွားပြီး အလုပ်မလုပ်နိုင်မှာ စိုးတဲ့အတွက် မပြောပဲ နေပေမယ့် ကျမ အမူအယာ ဘယ်လောက်ပျက်တယ်မသိ၊
" အမ နေကောင်းရဲ့လား ဘာဖြစ်နေလဲ စောစောထလို့ အိပ်ရေးမဝလာဘူးလား" ဆိုတာ
နှစ်ယောက်စလုံး တိုင်ပင်ထားသလို မေးနေကြသေးတယ်။ ဒါပေမယ့်( ၈)နာရီ ထိုးပြီးတဲ့ အချိန် ကို........... ရောက်လာတဲ့ အချိန်မှာ
" အဆင်ပြေလား၊ တာဝန်မှုး လာမေးသေးလား" အမေးကို
မနက်က အဖြစ်အပျက် ပြောပြလိုက်တော့ သူလဲ လန့်သွားပါတယ်။
                ၉နာရီမှာ မနက်ပိုင်း အသံလွှင့်တာတွေ ခေတ္တရပ်ထားပြီး (၁၀)နာရီ ပြန်မစခင်မှာပဲ နေ့တာဝန်ကျတွေ၊ ရေဒီယိုစက်မှုရဲ့ တာဝန်ခံတွေ ရောက်လာပါတယ်။ နံနက်ပိုင်း မှတ်တမ်းကို ဖတ်ကြည့်ပြီး ထုံးစံအတိုင်း ဖတ်၊ လက်မှတ်ထိုးပြီး ဘာမှတ်ချက်မှ ရေးထားတာမတွေ့၊ ထူးခြားဖြစ်စဉ်လဲ ရေးတာမတွေ့ပေမယ့် ထုံးစံအတိုင်း
" ချောချောမောမောပဲ မဟုတ်လား"
မေးတာကို သရဲ ခြောက်တဲ့ အကြောင်း ပြောသင့်မပြောသင့် စဉ်းစားရင်း ပြောပြလိုက်ပါတယ်။
တာဝန်ခံ အင်ဂျင်နီယာက လူဘာမှ မဖြစ်သွားလို့ တော်သေးတာပေါ့ဆိုတာ တဖွဖွပြောပါတယ်။ မှတ်တမ်းမှာ ထဲ့ရေးပါ ဆိုပေမယ့် မရေးချင်ဘူးလို့ငြင်းလိုက်ပါတယ်။ ဒီမှတ်တမ်းက  အင်ဂျင်နီယာမှုး၊ အင်ဂျင်နီယာချုပ်တွေဆီ လက်မှတ် ဆက်ထိုးရမှာမို့ သူတို့က ပေါက်ကရတွေ ဘာတွေ ရေးထားလဲ မယုံမကြည် ပြောရင် စကားအခြေအတင် ပြောနေရမှာမို့ပါ။ဒါပေမယ့် အင်ဂျင်နီယာမှုးဆီ အရောက်မှာ လက်မှတ်ထိုးပြီးတာနဲ့" ပြောပါအုန်း မနက်က သရဲခြောက်ခံရတဲ့ အကြောင်း" ဆိုတော့ မြန်မှမြန် ဟိုကနေ ဒီကို လမ်းလျှောက်လာတုန်း ဘယ်လို သိသွားပါလိမ့်၊မြန်မာ့အသံပဲ ဒီလောက်ရှိမှာပေါ့ တွေးပြီး ပြောပြရပါသေးတယ်။ သူကတော့ လူအစစ်မဟုတ်ဘူးလား၊ လူဝင်နေတာ မဖြစ်နိုင်ဘူးလား မေးခွန်း ထုတ်ပါသေးတယ်။ ည(၁၀)နာရီခွဲမှာ တာဝန်ပြီးသွားတဲ့သူက လုံခြုံရေးမှာ သော့အပ်ထားခဲ့တာကို မနက်တာဝန်ကျသူက လာထုတ်တဲ့ အချိန်ကြား ကာလမှာ ဘာအကြောင်းပြချက်နဲ့မှ အသံလွှင့်တဲ့ အခန်းသော့ကို ထုတ်ပေးလေ့မရှိတာ သူလဲ အသိပါ။ ဘယ်လိုမှ လူမပြောနဲ့ ယင်ကောင်တောင် ဝင်လို့မရပါဘူး၊ လူတစ်ယောက်ကို ထားခဲ့ရင်တောင် ၆၄ဒီဂရီ ဖာရင်ဟိုက်ဆိုတဲ့ အလုံပိတ် အအေးခန်းမှာ အဲဒီအတိုင်းထိုင်နေရင် အသက်ရှင်ရက် မရှိနိုင်ပါဘူး။ ဒါ့ကြောင့် ဘာမှပြန်မပြောပဲ နေလိုက်တော့တယ်။              ဒါပေမယ့် အဲဒီနေ့ ဂျူတီမထွက်ခင်မှာပဲ မနက်ဂျူတီဝင်မယ့်သူတွေ တစ်ယောက်ထဲ အရင်မဝင်ပဲ နောက်တစ်ယောက်လာမှ အနည်းဆုံး လူနှစ်ယောက်ရှိမှ ဝင်ဖို့ နှုတ်မိန့် ထုတ်ပါတယ်။ အဲဒီနောက် ဆက်တိုက်ဆိုသလို  ဟိုအခန်းမှာ ခြောက်တယ်၊ ဒီအခန်းမှာခြောက်တယ် စသဖြင့် သရဲသတင်းတွေ ခပ်စိပ်စိပ်ထွက်လာတာ အများကြီးဖြစ်လာပါတယ်။ ပြောရရင် အများကြီး ရှိတဲ့အထဲက ထူးဆန်းတာတစ်ခုကို ကိုယ်ကိုယ်တိုင် ကြုံရတာ မဟုတ်ပေမယ့် ပြောပြချင်ပါသေးတယ်။             
      ပင်မစက်မှုအခန်းထဲမှာ အသံသွင်းတဲ့ စတူဒီယိုတွေ ရှိပါတယ်။ စတူဒီယို( ဒီ) ဆိုတာက သီချင်းကြီးတို့၊ ကာလပေါ်သိချင်းတို့ အသံသွင်းတဲ့ အခန်းပါ။ စောင်း၊ ပတ္တလား၊ စန္ဒယား စသဖြင့် အစုံရှိပါတယ်။ ဟာဒယရွှင်ဆေးတို့ ဇာတ်ပြောတို့လဲ အဲဒီမှာ အသံသွင်းလေ့ရှိပါတယ်။ အသံသွင်းတာ နေ့တိုင်းမရှိပါဘူး။ တစ်ရက်မှာ အဲဒီအခန်း တာဝန်ကျသူက အသံသွင်း အစီအစဉ်မရှိတဲ့ အတွက် တံခါးလော့ချပြီး ခုံတွေ ဆက်ပြီး လှဲပါတယ်တဲ့၊ သူုပြန်ပြောတာကတော့ အိပ်ပျော်ပြီး အိပ်မက်လိုလို၊ မအိပ်သေးပဲ လာပြောတာလိုလိုပဲတဲ့၊ သူအသိဝင်လာတဲ့ အချိန်မှာတော့ အခန်းထဲကနေ ထထွက်ခဲ့တာပါတဲ့။ လူတစ်ယောက်က သူ့ကို ညီလေး...    အကို ဒီကနေ ကျွတ်ချင်ပြီ၊ အကို့နာမည်နဲ့ အမျှဝေပေးပါလို့ ပြောသတဲ့၊ ဒါနဲ့သူက အကိုက ဘယ်သူလဲ အကို့နာမည်ပြောလေ ဆိုတော့ အကို့နာမည်က ကို....... ပါတဲ့၊ နာမည်(၂)လုံးနဲ့ပါ။ နာမည်ကို သိပေမယ့် အတိအကျ  မရေးတာက သူ့မိသားစု ဖတ်မိရင် မကောင်းလို့ပါ။ အဲဒီနာမည်ကို သူ မသိဘူး။ အပြင်ကို ရောက်တဲ့ အခါ တခြားသူတွေလဲ ဒီနာမည်ကို ကြားတောင်မကြားဖူးပါဘူး။ မမြင်ဖူးပေမယ့် စီနီယာတွေရဲ့ နာမည်တွေက လက်ဆင့်ကမ်းပြီး သိနေကြတဲ့ အထဲမှာ အဲဒီ နာမည် မကြားဖူးကြပါဘူး။ ဒါနဲ့ ရှေ့မီနောက်မီ ဦးလေးကြီးတစ်ယောက်ကို မေးကြည့်တော့မှ
 " သိတာပေါ့တဲ့၊ ကို....က အဲဒီ စတူဒီယိုနဲ့ကပ်ရက်က စတူဒီယို(စီ)မှာ အလုပ်လုပ်နေရင်း မူးတယ် မူးတယ်ဆိုပြီး ဆုံးသွားတာပဲလေတဲ့"   
         နောက်တစ်နေ့မှာ စတူဒီယို(စီ)မှာ နိုင်ငံတော်သံဃာ့မဟာနာယက အဖွဲ့က ဆရာတော်ကြီးတွေ တရားတော် အသံသွင်းဖို့ ကြွလာတဲ့အခါ အမျှဝေပေးဖို့ ပြောတော့ ဂရုဏာသက်စွာပဲ အသံသွင်းပြီးရင် ကြွခဲ့မယ်ပြောပါတယ်။ ကျမတို့လည်း နီးစပ်ရာပဲ ပိုက်ဆံကောက် အလှုငွေကို စာအိတ်နဲ့ထဲ့ပြီး အမျှဝေဖို့ စီစဉ်ကြပါတယ်။ ဆရာတ်ာတွေရဲ့ မေတ္တသုတ်ရွတ်အပြီး အဲဒီ ကို...ရဲ့ နာမည်ကို တပ်ပြီး အမျှဝေ အပြီးမှာတော့ ဒိလောကသားတွေကို သနားစရာ အဖြစ် ခံစားလာမိပါတော့တယ်။                         အဲဒီနှစ် နှစ်ဆန်းတစ်ရက်နေ့မှာ ထုံးစံအတိုင်း ပရိတ်ရွတ်ကြပါတယ်။ ထုံးစံကတော့ အဆောက်အဦရဲ့ အပြင် လမ်းပေါ်မှာပဲ ဘုန်းကြီးပင့်ပီး ပရိတ်ရွတ်တာပါ၊ တာဝန်ကျ ဝန်ထမ်းတွေထဲကပဲ တစ်ယောက်ထားခဲ့ပြီး တခြားသူတွေ ပရိတ်တရားနာကြပါတယ်။ အဲဒီ နှစ်မှာတော့ ( အမှတ်မမှားရင် အဲဒီ နောက်ဆုံးနှစ်ပဲ ထင်ပါတယ်၊ နောက်နှစ်ကစပြီး နေပြည်တော်(တပ်ကုန်း)) ကို ပြောင်းကြရပါပြီ )သရဲခြောက်ခံရတာတွေ ဆက်တိုက် ဖြစ်လာတဲ့အတွက် ဌာနရဲ့တာဝန်အရှိဆုံးလူ ကိုယ်တိုင်က စက်ခန်းထဲမှာ ပရိတ်ရွတ်ဖို့ ခွင့်ပြုပါတယ်။ အသံလွှင့်တဲ့ အဲဒီ ပင်မစက်ခန်းက တာဝန်ရှိသူမှအပ မဝင်ရ ဆိုင်းဘုတ်ထောင်ထားတဲ့ နေရာပါ။ အပြင်လူ လုံးဝ( လုံးဝ) ဝင်လို့မရပါ။ အသံသွင်းမယ့် ပြင်ပပုဂိုလ် ခေါ်မယ်ဆိုရင် အဲဒီလူရဲ့ မှတ်ပုံတင်နံပါတ်၊ နာမည် အစရှိတာကို လုံခြုံရေးဌာနကို( ၃)ရက်ကြိုပြီး တင်ထားရတာပါ။ ဒါ့ကြောင့် ပင်မစက်ခန်းထဲမှာပါ ဘုန်းကြီးတွေ ကြွလာပြီး ပရိတ်ရွတ်ပေးမယ် ဆိုတော့ ကမန်းကတန်း စီစဉ်ရပါတယ်။ ရုံးတစ်ပတ်ပတ်ပြီး ပန်းတွေခူးလိုက်တာ (၇)နေ့နာမ် အကုန်ရပြီး ပရိတ်အိုး ဖြစ်သွားပါတယ်။ ဘုန်းကြီးတွေ ကြွလာပြီး ရေစက်ခွက်ပါ ယူလာပါဆိုတာနဲ့ ရေစက်ခွက်တွေ ထဲ့လာတာမှာ တစ်ခွက်ပိုနေပါတယ်။ တရားနာမယ့် ပရိတ်သတ်က တာဝန်ကျသူတွေ ချည်းမို့ အသံလွှင့်စတူဒီယိုခန်းထဲမှာ တစ်ယောက်စီထားပြီး ထွက်လာတာတောင် (၁၀)ယောက် မပြည့်ပါဘူး။ လူကြီးကတော့ အင်ဂျင်နီယာမှုးကိုယ်တိုင် ပါပါတယ်။ ပိုနေတဲ့ ရေစက်ခွက်ကို အစွန်က လွတ်နေတဲ့ နေရာမှာ ဘာရယ်မဟုတ် ထားလိုက်ပြီး ပရိတ်တရားနာကြပါတယ်။ ရေစက်ချတဲ့ အချိန်မှာ အဲဒီ လွတ်နေတဲ့အစွန်မှာ ထိုင်နေတဲ့  ဝန်ထမ်းက ရေစက်ခွက် လှုပ်သံကြားလို့ မကြည့်တော့ပါဘူးတဲ့၊ သူက နှလုံးရောဂါရှိတော့ မြင်ရင် ကြောက်မှာဆိုးတဲ့ အတွက် မကြည့်ပဲနေလိုက်တာတဲ့၊ အနားမှာလဲ တခြားသူတွေ ရှိပြီး ဆရာတော်ကြီးတွေလဲ ရှိလို့ တော်သေးတာ ကြောက်တာ တုန်နေတာပဲတဲ့ ပြန်ပြောပြပါတယ်။ သူတင်မဟုတ်ပါဘူး၊ သူ့ရှေ့က ထိုင်နေတဲ့ တစ်ယောက်က အသံကြားလို့ လှည့်ကြည့်တော့ ရေစက်ခွက်က ရေတွေ အောက်ခံ ပန်းကန်ပြားပေါ် ကျတာ တွေ့တာနဲ့ ခေါင်းကြီးသွားလို့ မနဲ မျက်စိမှိတ်ထားလိုက်ရသတဲ့။ တရားနာပြီးတဲ့ အခါ အဲဒီရေစက်ခွက်ရဲ့ အောက်ခံပန်းကန်ပြားမှာ ရေတွေ ရှိနေပြီး သွန်မယ့်သူမရှိလို့ ယောကျ င်္ားလေးတစ်ယောက်က ယူသွားပေးပါတယ်။ 
            ကျမရဲ့ ကလေးတွေက " သရဲဆိုတာ တကယ်ရှိသလား" လို့ မေးလာရင်
 " အလကားပါ၊  မရှိဘူး၊ လူတွေ ကြောက်အောင် တမင်သက်သက် လျှောက်ပြောနေတာ" လို့ ငယ်ငယ်တုန်းက ပြောသလို မပြောဖြစ်တော့ပါ.။သရဲဆိုတာ တကယ်ရှိလား မရှိဘူးလား ဆိုတာကို ကြုံခဲ့ရတာတွေ ပြန်ပြောပြရင်း သူတို့ဘာသာပဲ စဉ်းစား တွေးတောစေတော့တယ်။သရဲဆိုတာ မရှိပါဘူးလို့ယုံခဲ့ဖူးတဲ့ ကျမက သရဲကား၊ သရဲခြောက်တဲ့ အခန်းတွေဆို မကြည့်ရဲပဲ မျက်လုံးမှိတ်ထားတတ်ပေမယ့် ကျမရဲ့ကလေးတွေကတော့ တစ္ဆေသရဲကားကြည့်ပြီး သရဲခြောက်တာကို တဟားဟားနဲ့ ရီနေကြပါတယ်။ သူတို့ကြည့်တဲ့ ရုပ်ရှင်ထဲက သရဲတွေက ဟာသဖြစ်နေလို့လားတော့ မပြောတတ်ပါ။

No comments:

Post a Comment