May 7, 2017

" ပြောင်းမှာလားလို့ မေးချင်သည်" ၈ရက် မေလ ၂၀၁၇ခုနှစ်၊ ဒီလှိုင်းစာစောင် အတွဲ(၆) အမှတ်(၁၇)


ကျောင်းပိတ်ထားတုန်းမှာ ရှေ့လာမယ့် စာသင်နှစ်အတွက် သတ်မှတ်ထားတဲ့ သင်ရိုးညွှန်းတန်းတွေ လေ့လာရင်းက မြင်မိတွေးမိခံစားမိတာလေးကို ဖေ့စ်ဘွတ်မှာ ရေးတင်လိုက်သည်။ မထင်မှတ်ပဲ ခါတိုင်းရေးတဲ့ စာတွေနဲ့မတူ share လုပ်သူ like လုပ်သူတွေ များလှသည်။ မြန်မာပြည်တွင်းက မြို့နယ်ပညာရေးပေ့ခ်ျတွေကို ရှယ်ကြတာလည်း အများသား၊ ပညာရေးနှင့်သက်ဆိုင်သည့် ပေ့ခ်ျတွေအများအပြားနှင့် ဆရာ/ ဆရာမတွေကပါ ရှယ်ကြတာ သတိထားမိသည်။ သူတို့ ရှယ်သည့်အခါ ရေးကြသည့် စာလေးတွေ ကိုကြည့်ပြီး သုံးသပ်မိသည်က မြန်မာပြည်သူတို့ ပညာရေးနဲ့ပတ်သက်ပြီး အပြောင်းအလဲကို ပြင်းပြင်းထန်ထန် လိုချင်နေကြပြီဟု၊ ခေတ်မီစနစ်ကျပြီး လူ့လောကအလည်မှာ မှန်မှန်ကန်ကန် အသုံးတည့်နိုင်သည့် ပညာရေးစနစ်ကို လိုချင်နေကြတာ ထင်ရှားလှသည်။
ရေးလိုက်သည့်အကြောင်းက ထူးထူးခြားခြား မဟုတ်ပါ၊ ထိုင်းနိုင်ငံက ပြဌာန်းထားသည့် ကျောင်းသင်ခန်းစာထဲပါသည့် အကြောင်းအရာလေးတွေကို စိတ်တိုင်းကျ သဘောကျပြီး ရေးလိုက်တာသာဖြစ်သည်။
" ထိုင်းသင်ရိုးညွှန်းတန်းတွေ လေ့လာရင်းက ဘာသိလာရလဲဆိုတော့ ကျောင်းသားတယောက်က မူလတန်း၊ အလယ်တန်းလောက် တတ်မြောက်ပြီးတာနဲ့တင် လူ့လောကမှာ လူပီသသ နေတတ်တဲ့ အလေ့တွေ ရသွားစေတယ်၊ ကိုယ့်ကိုယ်ကို ကျန်းမာရေး စောင့်ရှောက်မှုနဲ့ အသက်ရှည်အောင် ဘယ်လို နေထိုင်သွားရမယ်ဆိုတာ သိသွားစေတဲ့ အပြင် အခြားသူတွေအပေါ် ပြစ်မှုကျူးလွန်မိရင် ကျရောက်လာနိုင်တဲ့ တရားစီရင်မှု ဥပဒေအကြောင်းတွေပါ အခြေခံကအစ သိထားကြပြီ ဖြစ်တယ်၊ အဲဒီအတွက် မိမိကိုယ်တိုင် အပေါ်မှာလဲ ဥပဒေအရ ကာကွယ်ထားတာတွေ ကျောင်းသားဘဝကတည်းက သိထားတဲ့အတွက် စိတ်ပိုင်းဆိုင်ရာ ရုပ်ပိုင်းဆိုင်ရာ လုံခြုံမှုကို ခံစားပြီး ကြီးပြင်းရတဲ့ သဘောကို မြင်ရတယ်။
ကိုယ်အခု လေ့လာနေတဲ့" Physical Education " ဆိုတဲ့ ဘာသာရပ်မှာ လူ့ဘဝကို ဘယ်လိုရတာလဲ၊ အာဒံနဲ့ဧဝ၊ ဗြဟ္မာကြီး(၄) ဦး၊ ဒါတွေ မပါပဲ ရိုးရိုးလေးပဲ ရှင်းပြထားတယ်၊ အဖေနဲ့ အမေပါမယ်။ တဖြည်းဖြည်း အရွယ်နဲ့လိုက်ကာ ပြောင်းလဲသွားတဲ့ ရုပ်ပိုင်းဆိုင်ရာ စိတ်ပိုင်းဆိုင်ရာ သဘောတရားတွေ၊ sex နဲ့ ပတ်သက်ပြီး မသဘာဝ၊ ကျားသဘာဝ ရှင်းပြထားတယ်၊ sexual abuse နဲ့ ပတ်သက်ပြီး ဥပဒေတွေ အမျိူးမျိူး ရှိတာကို sector အလိုက် ပြစ်မှုအမျိူးမျိူး ခွဲပြပြီး ထောင်ဒဏ် ငွေဒဏ် ကျခံနိုင်ရတယ်ဆိုတဲ့ အချက်တွေလည်း ပါတယ်၊
ဒီနေရာမှာ အလိုမတူပဲ လိင်ပိုင်းဆိုင်ရာ ကျူးလွန်တဲ့ သူကို သေဒဏ်အထိ အပြစ်ပေးတယ်ဆိုတာပါ ဖတ်ရတယ်။ အသက်(၁၅)နှစ်အောက် အရွယ်တွေအပေါ် လိင်ပိုင်းဆိုင်ရာ ပြစ်မှုကျူးလွန်ခဲ့ရင် ကြီးလေးတဲ့ ပြစ်ဒဏ်တွေ ပေးတယ်ဆိုတာ ပုဒ်မတွေနဲ့ သေချာရေးထားတယ်၊ ကျူးလွန်ခံရသူ သေသည်အထိ ဖြစ်ခဲ့ရင် ကျူးလွန်သူဟာ သေဒဏ်လို့ တိတိကျကျ ရေးထားတယ်။
ကျောင်းမှာ ငယ်စဉ်ကတည်းက ပြစ်မှု ပြစ်ဒဏ် ကောင်းကျိူးဆိုးကျိူးကို ပြောပြထားတယ်။ ဥပဒေဆိုတာ မသိလို့ မဖြစ်ရအောင် သိစရာရှိတာ ပေးသိထားတယ်။ ငယ်ရွယ်သူတွေကို အကြောက်တရားမရှိစေရ ဆိုပေမယ့် မဟုတ်တာလုပ်တာကို ကြောက်တတ်အောင် တခါထဲ အသိပေးပုံရတယ်။
အဲဒိနောက် ကူးစက်ရောဂါ အကြောင်းတွေ၊ ရောဂါကူးစက်ပုံနဲ့ ကာကွယ်နည်းတွေ စနစ်တကျ ရှင်းပြထားတယ်၊ အရှည်ကြီးနဲ့ စာလေးလေး မဟုတ်ပဲ ကျောင်းသားအရွယ်တွေ ရှင်းရှင်းလင်းလင်း သိအောင် တိုတိုတုတ်တုတ် ကျစ်ကျစ်လစ်လစ် ရေးထားတယ်၊
အိမ်သုံးဆေးဝါးတွေကို ဘယ်လို စနစ်တကျ အသုံးပြုနိုင်တယ်ဆိုတာ ဆောင်ရန်ရှောင်ရန် တွေနဲ့ သေချာ ရေးသားပြဋ္ဌာန်းထားတယ်၊
ကိုယ်ကာယလေ့ကျင့်ခန်း အမျိူးအစားတွေနဲ့တကွ လေ့ကျင့်ခန်းယူခြင်း အကျိူးတွေ တခုချင်းစီ ရေးထားတယ်၊ သီချင်းဆိုပြီး ကတဲ့ လွယ်လွယ်ကူကူ လေ့ကျင့်ခန်းနည်းတွေပါ ပုံနဲ့တကွ ရေးထားတယ်။
နောက်ဆုံးမှာတော့ Thai Massage ရဲ့ အကျိူးနဲ့ စီးပွားရေး လုပ်ငန်း အဖြစ်တွင်ကျယ်လာပုံ တွေ ပြဋ္ဌာန်းထားတယ်၊ ထိုင်းနိုင်ငံတဝှန်းမှာရှိတဲ့ မာဆတ်သင်တန်းကျောင်းတွေရဲ့ လိပ်စာတွေ သေချာပြုစု ထည့်သွင်းပေးထားတယ်၊ အလယ်တန်းအောင်လို့ အသက်မွေးဝမ်းကျောင်း ပညာအဖြစ် ဆက်သင်ချင်က သင်နိုင်မယ့် ရည်ရွယ်ချက်ပါ တခါထဲ ပါပုံရတယ်။
ထိုင်းသင်ရိုးညွှန်းတန်း အတိုင်း ကိုယ်သင်ဖူးတာ သင်္ချာရယ်၊ သိပ္ပံရယ်၊ အဲဒီဘာသာရပ်တွေမှာ မြန်မာသင်ရိုးညွှန်းတန်းနဲ့ သိပ်မကွာပေမယ့် တခြား ဘာသာရပ်တွေက တော်တော်လေး ကွာတာ သတိပြုမိတယ်။ မူလတန်းအဆင့်ကတည်းက အခြေခံ စာရင်းအင်းပညာ ပါတယ်၊ ဈေးစာရင်း ပြုစုတာ ဈေးဝယ်တာ ဈေးရောင်းတာ ပါတယ်။
အတန်းပညာ သင်ယူတတ်မြောက်ပြီးတဲ့အခါ ၂၃နဲ့ ၄၅ မမြှောက်တတ်ရင် calculator နဲ့ မြှောက်ချင် မြှောက်ကြလိမ့်မယ်၊
လူ့ဘဝကို ဘယ်လိုရပ်တည်မလဲ ဆိုတဲ့ အတွေးအခေါ်နဲ့ တိုင်းပြည်ရဲ့ ဥပဒေဘောင်အတွင်း အများနဲ့ နေသားတကျ ဘယ်လို နေထိုင်ရမယ်ဆိုတာတွေတော့ အများကြီး တတ်သွား သိသွားကြလိမ့်မယ်ထင်တယ်။"
ဒီစာကို ရေးပြီးနောက်ပိုင်း ဆွေးနွေးလာတဲ့ သူတချိူ့ရဲ့ စကားသံတွေအရ မြန်မာ့ပညာရေးရဲ့ သင်ရိုးညွှန်းတန်းမှာ ပါဝင်မှု အားနည်းနေတဲ့ စိတ်ပိုင်းနဲ့ ရုပ်ပိုင်းဆိုင်ရာ တိုးတက်စေတဲ့ သင်ကြားနည်းတွေ ပါဝင်စေချင်တယ်ဆိုတာရယ်၊ လိင်ပိုင်းဆိုင်ရာ ပြောင်းလဲမှုနဲ့ အဲဒီအပေါ်မှာ အမြတ်ထုတ်မှုတွေ မဖြစ်အောင် သင်ခန်းစာတွေ ထည့်သွင်းစေချင်ပုံရကြတယ်လို့ ကောက်ချက်ချမိရသည်။ sex နဲ့ ပတ်သက်လာရင် မိဘနဲ့ သားသမီး မပြောသင့်တဲ့အရာလို့ လက်ခံထားတာတွေ ၊ အလွန်အမင်း ဖိနှိပ်မှုတွေ များတဲ့ အရှက်အကြောက်ကို ဦးစားပေးတာတွေ အခုလို ခေတ်ကြီးမှာ မရှိသင့်တော့ပေ။ ငယ်စဉ်ကတည်းက ပညာရေးကနေတဆင့် သင်ယူသွားရမယ့်အရာတွေမှာ တဖြည်းဖြည်း အရွယ်ရောက်လာတဲ့အခါ လူ့လောကထဲ အများနဲ့ သင့်တင့်အောင် လူလူချင်း အဆင်ပြေအောင် ပေါင်းသင်းဆက်ဆံ တတ်ကြဖို့ အသိတရားတွေ ရသွားဖို့ လိုလေသည်။
ကျောင်းစာမှာ မေးခွန်းတခုအတွက် နှစ်မျက်နှာ သုံးမျက်နှာ ရှိတဲ့ စာတွေ အလွတ်ရအောင်ကျက်၊ စာမေးပွဲမှာ ချရေး အောင်သွားပြီး တတန်းပြီးတတန်းတက်ကာ အချိန်တန်ဘွဲ့ရ၊ စာတတ်ပေတတ် ဖြစ်ကြပြီး ပညာမတတ်ခဲ့သူတွေ များလာပါက တိုင်းပြည်အနာဂတ် မတွေးရဲစရာပါ။ စာသင်တာ ရာထူးကောင်းကောင်းရဖို့၊ ပိုက်ဆံများများ ရှာနိုင်ဖို့ ဆိုသည့် မျိူးဆက်သစ်တွေချည်း ဖြစ်လာပါက သာယာအေးချမ်းသည့် လူ့ပတ်ဝန်းကျင် ဆိတ်သုဉ်းသွားပါလိမ့်မည်။
မြန်မာပြည်သား နိုင်ငံသူနိုင်ငံသား အားလုံးက ဒီအဖြစ်တွေကို သိရှိပြီး ညံဖျင်းလှပြီး ခေတ်မမီတော့သည့် သင်ရိုးညွှန်းတန်းနေရာမှာ ခေတ်စနစ်နဲ့ ကိုက်ညီသည့် သင်ရိုးညွှန်းတန်းတွေကို နောင်လာမည့် မျိူးဆက်သစ်တွေအတွက် ထားပေးစေချင်လှတာတွေ့ရသည်။ လတ်တလော ပြောင်းလဲနေတာက အတွင်းကျကျမဟုတ်ပဲ ပြောင်းယောင်ဆောင်ထားသည့် ဟန်ပြအခြေအနေတွေ ဖြစ်တယ်ဆိုတာ အားလုံးက သိနေပေပြီ။ ပြည်သူကလည်း ပြောင်းချင်နေတာအသင့် ဆိုက ပြည်သူနဲ့အတူ သတ္တိရှိရှိ လိုက်ပါ ပြောင်းလဲ နိုင်ရမည်၊ ပြောင်းလဲတယ်ဆိုတဲ့ အဓီပ္ပါယ်စစ်စစ်က မူလအတိုင်း အသွင်အပြင်မရှိတော့တာကို ဆိုလိုသည်။ နာမည်တွေ လိုက်ပြောင်းတာ နာမည်သာပြောင်းမည်၊ အနှစ်သာရက ဒုံရင်းဒုံရင်းသာ၊ ပြည်သူကအတူလိုက်ပါ ပြောင်းလဲပါမည် ဆန္ဒပြင်းပြတာကို တာဝန်ရှိသည့် ပြည်သူ့အစိုးရက ရဲရဲတင်းတင်း ဦးဆောင် ပြောင်းလဲနိုင်ပါစေ မျှော်လင့် ဆုတောင်းနေမိပါတော့သည်။
ခိုင်ခိုင်စောလွင်

No comments:

Post a Comment